CEBU, Philippines - Nasunog ang ikaduhang andana sa display center sa Honda Motors sa dalan A.C. Cortes Avenue ug eskina dalan Plaridel sa barangay Alang-Alang, dakbayan sa Mandaue alas 6:03 ang takna sa miaging gabii.
Si SFO4 Roy Garcia, imbestigador sa kabomberohan sa maong dakbayan nga nahinabi sa Banat News miingon nga ang mga kawani sa nahisgotang establisamento nga didto sa ground floor maoy nagtinabangay sa pagpawong sa kayo.
Dugang pa niya nga dali nilang gipaubos sa Task Force Alpha ang maong sunog nga maoy hinungdan sa nahiabot usab dayon ang mga fire truck nga gikan sa uban pa nga kabomberohan sa dakbayan sa pagtabang og pawong sa kayo.
Matud pa ni SFO4 Garcia nga mikabat sa P300 mil ang balor sa mga butang nga gihabhab sa kayo atol sa maong sunog.
Gitataw niya nga wala pa nila matino ang hinungdan sa kalit nga pag-ulbo sa kayo sa maong establisamento.
Hinuon walay naangol o kaha kinabuhing naangin sa maong sunog. (Romeo T. Limpangog/WC) (BANAT NEWS)