Ginang gipusil sa nangabubhong kapuyo

CEBU, Philippines -  Kritikal ang kahimtang sa usa ka 27-anyos nga babaye human kini pusila sa iyang kapuyo nga nagselos kagahapon sa buntag diha sa bodega sa junk shop sa Ramona Village, barangay San Isidro, dakbayan sa Talisay.

Ang biktimang si Judith Lugay, taga sitio Mananga I, barangay Tabunok nakaangkon kini og usa ka samad pinusilan sa walang abaga ug tulo ka samad pinusilan sa tuong bahin ubos sa iyang tiyan daling gidala sa iyang kauban sa trabaho ngadto sa Talisay City District Hospital.

Ang suspetsadong kapuyo sa biktima nga si Benjamin Buton, 37, residente usab sa sitio Mananga I, dali kining misibat ug padayon pang gipangita sa mga polis.

Sila si SPO4 Daniel Tarucan, PO3 Benedicto Lasque ug PO3 Ferdinand Pablo maoy miresponde sa maong hitabo ug nagpahigayon og hot pursuit operation batok sa suspetsado.

Si Tarucan nga nahinabi sa Banat News kagahapon nagkanayon nga selos ang hinungdan sa maong insidente.

Giingong nagduda si Lugaylugay kang Buton nga duna kini laing lalaki apan ang suspetsado kinsa walay trabaho ang giingong maoy dunay laing uyab.

Ang pagpunay og selos sa suspetsado maoy hinungdan sa ilang panag-away sa biktima.

Matud ni Tarucan nga si Lugay kinsa nagtrabaho sa usa ka junk shop sa Ramona Village maoy nagsuporta sa ilang mga panginahanglanon ni Buton tungod kay ang suspetsado walay trabaho.

Sa imbestigasyon sa kapolisan nasuta nga niadtong Huwebes grabe ang away ni Buton ug Lugay tungod sa selos ug gani gipalayas sa suspetsado ang biktima gikan sa ilang balay.

Ang biktima kinsa naglikay sa kasamok milakaw usab kini ug diha matulog sa balay sa ilang silingan diha sa duol.

Kagahapon pasado alas 7:00 sa buntag sa wala pa mahitabo ang pagpamusil ang biktima nag-abli kini sa gamay’ng pultahan sa gate sa junk shop aron makasulod ang iyang mga kauban nga miabot.

Apan miabot usab ang suspetsado hinungdan nga daling gisirado sa biktima ang pultahan apan gipusil sa suspetsado ang pultahan ug ang bala milahos kini ug naigo ang walang abaga sa biktima.          

Wala pa matagbaw ang suspetsado misulod kini sa junk shop ug giusban pagpusil ang biktima kinsa niadtong tungora nagpakiluoy nga dili na siya usban.

Giingong ang suspetsado wala kini mamati sa pakiluoy sa biktima ug giusban gyud niini og pusil si Lugay.

Ang grupo ni Tarucan daling miadto sa balay ni Buton apan wala na maabti sa maong mga polis diha sa ilang balay ang suspetsado tungod kay nakasibat na kini pag-abot sa mga polis. (EIM)  (BANAT NEWS)