Anti-RH Bill dismayado sa nahitabo

CEBU, Philippines - Mga pro-life groups nasagmuyo sa pagkabasura sa ilang tinguhang mabasura sa Kongreso ang kontrobersyal nga Reproductive Health Bill nga gipasar kagahapon sa kaadlawon human sa nominal voting.

Usa sa mga nasagmuyo mao si Fr. Carmelio Diola kinsa atoa sa kaulohan aron personal nga saksihan ang unta pagkabasura sa RH Bill. Ang grupo ni Diola mikuyog sa pundok ug uban pang sector nga supak sa maong balaudnon didto sa kaulohan.

Matud pa ni Diola sa balita sa News 5 kagahapon, nabalaka silang nahisusama na ang kultura sa mga Filipino sa mga taga kasadpang mga nasud nga menus na ang kaikog ug kahadlok ngadto sa Ginoo.

Miabot sa 113 ka mga kongresista ang mibotar pabor sa RH Bill samtang 104 lang ang mibotar supak niini. Tungod niini nasagmuyo ang mga nangusog sa pagbasura sa maong balaudnon tungod kay adunay mga kongresistang giingong misaad kanila nga mobotar apan wala manungha didto sa kongreso alang sa botohay.

Sa samang report sa News5, si Dr. Rene Bullecer sa Human Life International nanuyo gumikan sa giingong wala pagtambong sa mga Sugboanong kongresista nga pwerteng nakapadayag sa ilang pagsupak sa RH Bill.

Matud pa ni Bullecer kung dunay angay daygon sa mga kongresista walay lain mao lang si Kong. Manny Pacquiao kinsa gikan pa sa kapildihan sa mga kamot ni Juan Manuel Marquez didto sa Las Vegas.

Samtang si Msgr. Achilles Dakay, tigpamaba sa artsidiyosisi sa Sugbo sa iyang bahin miingon  ilang tahuron  ang hukom sa mga magbabalaod apan respetuhon sab unta nila ang baruganan sa Simbahan. Daw mipalabtik hinuon si Dakay nga karong panahona nahibalo na sila si kinsa ang ilang iduso o paluyohan sa umaabot nga piniliay.( /EIM) (BANAT NEWS)