CEBU, Philippines - Nangandam na ang siyudad sa Sugbo sa pagsugod sa Misa de Gallo karong Domingo sa kaadlawon.
Gimando ni Mayor Michael Rama ang pagpatuman sa mga opisyal ug kapolisan sa siyudad sa Sugbo alang sa kahapsay ug kalinaw atol sa pormal nga pagbukas sa Misa de Gallo karung pasko nga gitakdang magsugod unya sa petsa 16 ning bulana.
Si Rama mimando kang Senior Supt. Ramon Melvin Buenafe sa Cebu City Police Office nga mohimo na og lapad nga plano sa seguridad alang niini.
Suma pa sa mayor nga kinahanglan nga mapatuman ang police visibility sa mga simbahan ug ingon man usab sa mga mingaw nga lugar aron malikayan ang mga dautang elemento.
Gihangyo usab ni Rama ang publiko nga kinahanglan nga seguradoon nga naka-lock ang ilang mga balay sa higayon nga manimba aron dili kini makawatan.
Dili usab magsul-ob og mga mahalong alahas ug bisan unsang butang nga makapatintal sa mga kawatan ug tulisan panahon sa ilang pagsimba .
Gihangyo ni Rama ang Parish Security Group (PSG) aron ipatuman ang higpit nga seguridad sa tanang mga parokya dinhi sa dakbayan atol sa Santos nga Misa.
Nagtinguha ang mayor nga mopatawag og linaing tigum kabahin gihapon ning maong katuyoan aron pagseguro nga dili makahigayon ang mga dautang elemento pagmugna og kagubot ning maong okasyon.
Nagplano usab siya nga magbutang og police action centers sa matag simbahan aron dunay mga polis nga maka-responde sa mga dautang panghitabo nga motumaw sa mga manimbahay.
Gawas sa PSG ug kapolisan , gihangyo usab niya ang mga opisyales sa barangay nga mopakatap og mga barangay tanod sa mga simbahan.
Samtang susamang pangandam usab ang gihimo sa kapolisan sa siyudad sa Talisay.
Matud pa ni Insp. Margienette Yosores sa Banat News adunay mga magpatrolyang polis sa kadalanan sa adlaw sa Misa de Gallo.
Si Yosores nanawagan sa publiko nga kung ugaling duna silay mabantayang mga tawo nga mga kadudahan og lihok pwedeng motawag sa ilang mga numero sa hotline nga mao ang 273-3636 ug 272-8872 ug sa mobile hotline nga mao ang 514-4967 ug 514-4710.
Ang Talisay adunay tulo ka mga dagkung simbahan diha sa Tabunok nga mao ang Saint Joseph Parish Church, San Isidro Parish Church sa barangay San Isidro ug Santa Teresa de Avila sa barangay Poblacion butangan kini og police assistance center dapit sa agianan niini atol sa Misa de Gallo nga dugokon kaayo og tawo. (/EIM) (BANAT NEWS)