CEBU, Philippines - Gitinuod gyud ni gubernatorial candidate Hilario Davide III ang iyang hulga nga mopasaka og kaso batok ni Gobernador Gwendolyn Garcia ngadto sa Office of the Ombudsman-Visayas may labot sa pag-develop sa kontrobersyal nga Balili property sa Tinaan, Naga.
Kagahapon sa alas 9:30 sa buntag, si Davide mihatud sa iyang reklamo ngadto sa Ombudsman aron sa pagpaimbestigar sa giingong reclamation nga gibuhat didto sa controversial nga Balili Property sa Tinaan, Naga City.
Gawas ni Garcia giapil sa gireklamo si provincial treasurer Roy Salubre, president and general manager sa Supreme ABF Construction and Construction Supply Company Bernabe Gilbor og kasong administratiba and criminal.
Matod niya ang pagpa-develop ug paggasto og P27 million alang sa restoration sa maong lugar walay pagtugot gikan sa Sangguniang Panlalawigan.
Gisaway usab ni Davide ang maong pag-ugmad sa luna gumikan kay pending pa man ang kaso niini diha sa Sandiganbayan ug walay pagtugot sa korte ang maong proyekto.
Ang kasong gipasaka ni Davide mao ang anti-graft and corrupt practices act, grave abuse of authority, oppression, gross misconduct or conduct pre-judicial to the best interest of the service and Code of Conduct and Ethical Standards for Public Officials and Employees. Samtang si Bise- Gobernador Agnes Magpale ug Bokal Arleigh Jay Sitoy misang-at usab og buwag nga anti-graft case and malversation of public funds batok ni Garcia kagahapon.
Sa ilang complaint, ilang gihangyo si Ombudsman Conchita Carpio-Morales nga suspensuhon si Garcia samtang nagpadayon pa ang paghusay sa maong kaso sa Balili.
“We pray for an early investigation hereof and the eventual dismissal of Governor Gwendolyn F. Garcia from the service. We also pray for her preventive suspension pending investigation hereof,” sumala pa sa reklamo.
Si Magpale ug Sitoy nagkanayon nga ang pagpasaka nila og kaso gihimo human nila makita sa ilang inspeksyon sa Balili Property nga dunay reclamation nga nahitabo sa maong luna, ang lalawigan kusganong mihimakak nga reclamation ang ilang gibuhat sa maong luna.
Matud ni Magpale walay pagtugot gikan sa SP ang paggamit sa government funds para sa development sa Balili property.
Gihulagway nila nga obstruction of justice ang gihimo ni Garcia tungod sa pagtabon sa ebidensya.
Apan si Garcia sa usa ka phone patch interview sa News5 kagahapon nagkanayon nga dunay kolor politika ang pagpasaka og kaso batok kaniya sa iyang mga kaatbang.
Si Garcia kinsa atoa karon sa habagatang bahin sa Sugbo aron mangapud-apod og hinabang sa mga nabiktima sa bagyong Pablo miingon nga mibukal na ang kaldero sa politika.
Matud pa niya buot lang makakuha og media attention alang sa publisidad ang iyang mga kaatbang.
Gipasabot ni Garcia nga responsable siya ug wala siya’y nalapas nga balaod ug gani ang gihimong development sa Balili property nakapuno pa kini sa value sa maong property.
Matud niya nga dihang gihimo ang development sa Balili property wala kini standing order batok sa lugar. Ang gobernadora nagkanayon nga ang iyang mga kaatbang misang-at og reklamo aron lang mahatagan og higayon nga mapatik sa pamantalaan.
Kahinumduman nga si Mayor Michael Rama sa dakbayan sa Sugbo kinsa kaalyado ni Garcia ang gipasakaan usab og kaso sa milabay’ng adlaw.
Ug matud sa gobernadora nga manghinaot siya nga makita kini sa Sugboanon nga ang maong lakang sa pagpasaka og kaso batok kaniya dunay bulok sa politika.
Ang gobernadora midugang nga walay tukmang basehan ang mga kasong gipasaka batok kaniya ug gani buot siyang masuspenso sa iyang pwesto tungod kay adunay buot nga mopuli kaniya og lingkod sa gahom. (BANAT NEWS)