CEBU, Philippines - Usa ka 22-anyos nga lalaking modelo ang mireklamong gihinol ang pribadong parte sa iyang lawas sa usa ka bayot nga talent handler nga giingong mao untay modala kaniya sa usa ka pageant sa barangay Labangon kagahapong adlawa.
Ang reklamante unang midangop sa News 5 ug gipahibalo ang pagpangabusong gidangatan gikan sa mga kamot sa maong bayot. Ang reklamante gitabangan ug gidala ngadto sa buhatan sa Commission on Human Rights-7 diin kini gitambagan nga magpa-blotter sa kapolisan.
Inabagan sa Parian police station nakit-an ang suspek ug giimbitar kini sa kapolisan ug didto nahibaw-an nga gidala ang reklamante sa suspek sa iyang boarding house diha sa Parian ug didto giingong gihubo kini sa suspek ug sa kakugang sa biktima gihakop sa suspek ang iyang kinatawo.
Gumikan niini migawas ang biktima ug midangop sa iyang mga kabanay. Apan ang suspek kansang pangalan gipugngan sa Banat News tungod kay wala pay kasong nasang-at batok kaniya miingon nga gusto lang sa maong modelo nga mosikat maong mireklamo kini.
Apan ang reklamante mibahad nga mopasaka gyud og kaso batok sa maong bayot. (BANAT NEWS)