Bonus alang sa mga kawani sa Mandaue giaprobahan

CEBU, Philippines -  Ang mga kawani sa dakbayan sa Mandaue makadawat sa ilang cash incentives alang sa kasaulogan sa Pasko.

Atol sa ilang regular session sa miaging Miyerkules, ang konseho mipasar sa unang pagbasa sa ordinansa nga maghatag sa mga kawani og “year end cash incentives.”

Ubos niining ordinansa ang mga job-order employees ug mga kawani nga nagsweldo ubos sa P10,000 ang bulan makadawat og P10,000 samtang ang mga clean and green employees ug Barangay Nutrition Health Wokers makadawat og P5,000.

Sa laing bahin ang regular employees nga nagsweldo og P10,000 pataas makadawat og susamang kantidad sa ilang sweldo.

Sa mga regular employees tawgon kini nga 14th month pay samtang alang sa mga job order, clean and green ug barangay health workers  mao kini ang ilang 13th month pay.

Mokabat og 500 ang regular samtang sobra sa usa ka libo ang job order, clean and green ug barangay health workers.

Si Konsehal Beethoven Andaya, tsirman sa committee on Finance nga maoy nangamahan sa ordinansa miingon nga maghimo sila og special session karong adlawa aron ma-aprobahan ang “second and final reading” niini.  Naglaum si Andaya nga dili mosupak ang Commission on Audit  (COA) tungod kay wala pa man sila molapas sa budget niini.  (BANAT NEWS)