CEBU, Philippines - Tulo ka tawo nga nagpasiugda og suertres nga masiao nadakpan sa kapolisan didto sa usa ka balay sa barangay Upper Tabok, dakbayan sa Mandaue sa miaging hapon.
Nasakmit sa kapolisan gikan sa mga dinakpan mao ang fax machine, calculator, mga tally sheet nga napuno sa kombinasyon sa numero ug uban pa.
Ang nadakpan mao sila si Pabian Rosal, 63, ulitawo, Ricardo Antolijao, 50 ug Victoriano Maneja, 27, nga pulos minyo ug nagpuyo sa maong dapit.
Si PO2 Richard Ares sa kapolisan sa Presinto 3 sa Mandaue City Police Office (MCPO) nga nagbase sa barangay Basak nga nahinabi sa Banat News miingon nga ang ilang hepe sa Presinto 3 nga si Senior Inspector Wilson Abot maoy nangulo sa operasyon human sila makadawat og taho bahin sa illegal nga kalihokan sa mga dinakpan sa maong lugar.
Dugang pa niya nga ang pagsikop sa mga suspek milampos pinaagi sa paggamit nila og usa ka decoy nga ila ra usab nga kaubang polis nga maoy nagpaisyu og numero ug sa pagtunol na niini ila dayong gisignit ang mga suspetsado.
Ang tulo ka mga dinakpan nagkagulkol na karon sa prisohan ug napasakaan na og kaso, samtang tag P20 mil ang girekomendar sa korte nga piyansa alang sa temporaryo nilang kagawasan. (WC) (BANAT NEWS)