CEBU, Philippines - Mipasalig si Presidente Benigno Simeon Aquino III nga iyang tabangan ang mga Sugboanon nga makabaton og Bus Rapid Transit System (BRT) nga gipanglantawang maoy makasulbad sa problema sa trapiko. Atol sa bag-ohay pa lamang nga pagbisita sa Presidente dinhi sa Sugbo aron himamaton ang mga kandidato ubos sa Liberal Party (LP) nga modagan sa tuig 2013 iyang gipadayag nga gituki gyud niya uban sa National Economic Development Authority (NEDA) ang mahitungod sa dinaliang pagpatuman sa BRT gawas sa pagpalambo sa Mactan International Airport.
Gibana-banang P10 bilyones ang mamahimong magasto alang niining maong proyekto apan sumala pa sa taga NEDA nga lisod pa gyud kini nga mapatuman gilayon tungod sa kadaghan pa sa nag-ung-ong nga mga isyu nga angay unang hatagan og prayoridad gawas niini. Dugang pa niya nga unahon una nila pagpangita ang lain-laing dalan diin maapud-apod ang mga bus sa dili pa nila ipatuman kining BRT tungod kay sa pagkakaron lisod pa kaayo ipangita og kadalanan dinhi sa Sugbo nga dili huot sa trapiko
“Medyo may kulang. There is a need for segregated roads to minimize the stop and go pero meron ba talagang lugar sa Cebu na mas segregated tayo?” matud pa sa Presidente.
Gibutyag ni Aquino nga ang giplanong BRT maglakip kini sa mga lain-laing kadalanan ug hulipan ang mga jeep de pasaheroan nga maigo sa rota niini.
Gitug-an usab sa Presidente nga ang pagsagop sa mass transport system mao ang gipanglantawang direksyon sa gobiyerno sa Sugbo. Hinoon sa bahin ni Cebu City South District Congressman Tomas R. Osmeña, siya miingon nga uyon siya nga dili una mapatuman sa pagkakaron ang mahitungod sa BRT basta ipasalig lang nga dili gyud kini wagtangon sa plano tungod kay kining maong proyekto gikatakdang ipatuman sunod tuig.
Si Osmeña nagsugod niining maong adbokasiya niadtong naglingkod pa lamang siya isip mayor sa syudad sa Sugbo diin iyang gipasabot nga imbes Light Rail Transit (LRT) ang sagopon mas maayo kung BRT nalang.
Gibase ni Osmeña ang iyang desisyon sa malampusong estorya sa Bogota, Colombia diin ang aso nimenus tungod sa pagwala sa mga awto ug giilisan og BRTs, samtang luwas sa pedestrians ug may bike lanes nga gibutang alang sa tanan gumikan kay naluag na ang dalan. Pinaagi sa BRT mamahimong paspas ug mas dali na unya ang pag-abot sa mga pasahero ug giklaro nga dili gyud hingpit wagtangon ang mga jeepneys tungod kay sila may mosalo sa mga pasahero gikan sa mga BRT terminals. (Liezl Mabini Frasno/EIM)