CEBU, Philippines - Duha ka mga lalaki ang giingong naghikog sa managlahing dapit ug usa kanila ang giingong naguol na og mayo gumikan sa sakit niini sa panit maong gium-om niini ang armas ug gikablit aron tapuson ang iyang kinabuhi.
Maayong pagkabuslot sa alingagngag sa ulitawong gulang nga si Artemio Caballes Padayao, 42, molupyo sa maong lugar human giingong nagpusil sa iyang baba ginamit ang armas nga .357 rebolber pasado alas-10 sa buntag diha sa sitio Sambag 2 barangay Guadalupe dakbayan sa Sugbo.
Sa pasiunang imbestigasyon sa kapolisan nasayran base usab gibutyag sa pag-umangkon niini nga si Jerome kalit lang kaayo ang hitabo ug ang buto sa armas ra maoy iyang nadunggan nga naggikan sa kwarto sa iyang uyoan.
Sa diha nga iya kini nga gisusi maoy iyang nakita nga ang armas nag-ungot pa sa baba sa uyoan ug naglunang na kini sa kaugalingong dugo.
Gibutyag usab ni Jerome nga sukwahi sa estorya sa ubang tawo nga nag-antos ang iyang uyoan sa sangla hinungdan nga wala kini gawas-gawas apan ang tinuoray nga skin allergy lang ang nasinati sa iyang uyoan.
Sa pakighinabi sa Banat News ni SPO1 Rey Cuyos sa Cebu City Police Office, Homicide Section, mibutyag kini nga dili tungod sa skin allergy ang hinungdan sa pagpakamatay ni Padayao.
Tungod kay sa ilang nakuha nga impomasyon duna kini nervous breakdown sukad pa niadtong Hunyo ning tuiga nga maoy posibleng usa sa hinungdan.
Dugang impormasyon sa kapolisan nga nakuha mao nga tiggamitan kaniadto ang biktima og ginadiling drugas.
Matud pa sa barangay tanod nga si Edgar Tallo, nga wala sila’y nadawat nga report kalabot sa biktima tungod kay daghan man ang nakahulagway nga maayo kining tawo.
Samtang ang higala niini nga si Tyron Bitanyo, mihulagway nga komedyante ang namatay ug wala siya magdahom nga magkutlo kini sa iyang kinabuhi.
Matud pa ni Bitanyo nga katapusan niyang nakit-an ang iyang higala niadtong Sabado sa udto diin namalit pa kini og sud-an. “Murag naa siya’y nervous breakdown, kay ingon nga murag naa pud siya’y gimulo nga naa siyay madunggan,” matud pa ni Bitanyo. Gipasusi pa usab sa kapolisan kun aduna bay foul play ang kamatayon sa biktima.
Samtang sa Sitio Tamban, Western Poblacion sa lungsod sa Poro usa ka 19-anyos usab nga si Jonathan Suerto ang naghikog ginamit ang usa ka pisi nga iyang gihikot sa sanga sa usa ka punoan sa kahoy.
Sa pasiunang imbestigasyon sa kapolisan sa lungsod sa Poro nasayran nga niadtong Biyernes sa buntag nananghid pa kini nga manguha og kahoy apan wala na mabalik pa.
Nianang pagkabuntag sa ilang pagpangita nakurat nalang sila nga patay na kini nga nagbitay sa usa ka dakong kahoy. Gisusi pa sa municipal health officer sa maong lungsod nga si Dr. Leah Nagsuban kun wala bay foul play sa kamatayon sa biktima.
Ang kapolisan misubay pa usab ug kun unsa ang hinungdan sa paghikog sa biktima. (/EIM) (BANAT NEWS)