P.4M nasakiyo sa mga tulisan

CEBU, Philippines -  Bisan pa man sa kahigpit sa seguridad ug sa special gun ban nga gipatuman tungod sa National Thanksgiving Mass ni San Pedro Calungsod  nakalighot pa gyud ang mga tulisan sa pagpusil ug pagkuha sa P400 mil sa usa ka negosyante diha sa dalan A.Soriano sa barangay Tejero ning dakbayan sa Sugbo niadtong milabay’ng gabii.

Giila ang biktima mao si Edgar Arnoco Hortelano Jr. 37, nga tag-iya og usa ka coffee shop sulod sa usa ka dakong mall sa uptown Cebu City kinsa nakaangkon og samad pinusilan sa iyang tiyan.Wala pa mailhi sa kapolisan ang duha ka mga lalaking pulos nagsuot og full-face helmet luwan sa itom nga motorsiklo.

Sumala pa sa imbestigasyon sa Theft and Robbery Section gihapak ang luyo sa  sakyanan ni Hortelano maong  mihunong kini .Apan nakugang nalang kini nga gitionan na siya og armas sa mga lalaki ug mideklarar og tulis, dihang misuway og dagan ang biktima gipusil kini sa tiyan nga milapos sa paa.

Nadala sa mga tulisan ang P400 mil sa biktima samtang gidala sa Vicente Sotto Memorial Medical Center si Hortelano ug luwas na sa peligro.  (BANAT NEWS)