CEBU, Philippines - Patay na nga nakit-an ang 23 anyos nga ulitawo nga nga may duha ka dinunggaban sa lawas didto sa Sitio Kansubing, barangay Buagsong sa lungsod sa Cordova niadtong Huwebes sa hapon.
Ang biktima nailhan nga si Dominic Mancao Dacua, 23, ulitawo, nga nagpuyo sa Sitio Ubos, barangay Poblacion, Cordova.
Si SPO1 Laurencio Wagwag sa Cordova Police Station mibutyag sa Banat News nga ang biktima kinsa may duha ka samad dinunggaban nagbuy-od sa kalibonan dihang nasigpatan kini sa usa ka tawo nga misum-ok sa maong dapit ug maoy mitaho dayon ngadto sa kapolisan.
Sumala sa kapolisan nga ang samad sa maong biktima sa dughan maoy gituohan nga maoy iyang namatyan.
Nasuta sa kapolisan nga ang biktima manghilabot kuno usahay sa di niya butang nga maoy gituohang hinungdan nga siya gipatay.
Padayon pang gipangita sa kapolisan ang criminal nga mipatay niini. (/WC) (BANAT NEWS)