P10m smuggled sugar nasakmit
CEBU, Philippines - Gipangita karon sa Bureau of Customs ang gituohang sindikato nga misuway sa pagpalusot og smuggled nga mga asukar human ang consignee nga nakabutang sa dokumento wala moangkon nga ilaha ang maong kargamento.
Si Customs Commissioner Rufino "Ruffy" Biazon sa usa ka press conference kagahapon miingon nga ilang gukdon ang mga nagpasiugda niini bisan na og kung ang uban mga kawani sa BOC.
"Mananagot sa batas ang dapat managot. We will never allow the export and freeport zones to be used by smugglers as conduits for their illegal activities," matud pang Biazon.
Ang napulo ka container vans gisakmit niadtong Nobiyembre 22, 2012 human mabantayi sa BOC-Xray Division and the Enforcement and Security Service nga ang dokumento niini peke.
Si BOC-X-ray division head Lourdes Mangaoang miingon nga wala mag-agi sa x-ray nga gipayuhot dinhi sa pantalan sa Sugbo ug maayo na lang naapsan pa ang pito ka container vans nga ipagawas na unta sa adwana.
Matud pang BOC-Cebu district collector Ronnie Silvestre sugdan na nila dayon ang forfeiture proceedings batok sa maong gibanabanang P10 milyones nga shipment sa asukar.
Si Biazon, Silvestre ug Mangaoang uban sa BOC officials maoy miabli sa container vans kagahapon, giingong gidiskarga kini gikan sa MV Titan gikan pa sa Thailand.
Gideklarar sa dokumento nga mga marbles, granite products ug eyeglasses ang sulod niini nga tataw nga kalapasan sa Section 2503 sa Tariff and Customs Code of the Philippines. (BANAT NEWS)
- Latest
