CEBU, Philippines - Upat ka tawo ang naangol apil na ang negosyante og hayop human magkabangga ang duha ka motorsiklo nga nagkasugat sa kurbadahong bahin sa Sityo Lantawan barangay Daanlungsod lungsod sa Tuburan niadtong Miyerkules sa alas 3:10 sa hapon.
Ang unang motorsiklo gimaneho sa negosyanteng si Erick Mepieza, 34, nagpuyo sa Lutupan siyudad sa Toledo ug angkas niining si Reneboy Donoz, 39, taga barangay Syete sa Tuburan.
Samtang ang gikaengkwentro niining motorsiklo nga gihulagway nga kalabira ang porma gimaneho ni Alison Villamor, 24, taga barangay Dos, sa mao gihapong lungsod ug angkas niini nga nailhan lang nga si Alyas Bebong Fortunado.
Matud ni PO2 Dexter Arapoc sa Tuburan Police Station dihang nahinabi sa Banat News, si Villamor gikan sa lungsod sa Tuburan samtang sugat nga direksyon si Mepieza apan pag-abot sa kurbadahun nga bahin sa maong lugar giingong nikawat sa pikas nga linya si Villamor ug maoy nakaingon sa dinasmagay.
Pulos nalabay ang tanang sakay sa duha ka motor ug ang mga laing nahiagi sa lugar mao nay mitabang kanila ug nihatud sa Tuburan District Hospital.( /EIM) (BANAT NEWS)