CEBU, Philippines - Andam na ang tanan alang sa Department of Labor and Employment (DOLE) 7 sa hingpit nga pagpatuman sa umento sa suholan nga P22 sugod karong Disyembre 7, 2012.
Atol sa tulumanong Associaton of Government Information Officers (AGIO-7) Forum kagahapon didto sa buhatan sa Department of Labor and Employment (DOLE-7) gipadayag ni Grace C. Carreon, Secretary sa Regional Tripartite Wages and Productivity Board (RTWPB-7) nga kining maong umento sa sweldo pareho nga ipatuman sa tanang lalawigan sa rehiyon 7.
Tungod kay sa kasamtangan P305 man matag adlaw ang minimum nga suweldo sa mga nanarbaho sa pribadong sector, sugod sa Disyembre 7, mahimo na kining P327. Apan iyang gitataw nga kining P327 madawat lamang kini sa mga trabahante sa Metro Cebu, o gikan sa dakbayan sa Sugbo hangtod sa dakbayan sa Carcar sa habagatan, samtang sa norte, ang maong suholan madawat lamang usab sa mga trabahante nga gikan sa dakbayan sa Sugbo hangtud sa dakbayan sa Danao.
Ang mga nanarbaho sa mga dakbayan sa Toledo ug Bogo ug mga kalungsoran sa lalawigan nga lapas na sa Metro Cebu areas, modawat na lang sila og tag P307 matag adlaw. Samtang sa lalawigan sa Bohol, ug Negros Oriental, P297, ug sa Siquijor , isla sa Bantayan ug Camotes, ipatuman didto ang P282 nga minimum nga suhol
Samtang gipangandaman na sa DOLE ang pagpatuman sa bag-ong minimum nga suholan, gihan-ay usab nila ang nagkadaiyang aktibidad alang sa pagsaulog nila sa ika-79 nga kasumaran sa pagkahimugso sa DOLE karong Disyembre 8, sumala ni Regional Director Ma. Gloria Tango.
Matud ni Tango nga sa miaging Domingo gisugdan nila ang mga aktibidad nga kabahin sa maong kasaulogan sama lumba sa dagan, gisundan kagahapon sa ilang pakig-atubang sa taga media, ug matag adlaw nagkalainlain ang ilang gihan-ay nga mga aktibidad hangtud sa Disyembre 6 nga maoy gitakda nga dakong programa sa selebrasyon ug mahimo nilang pinasidunggang dinapit ang kalihim sa pamuo.( WC) (BANAT NEWS)