CEBU, Philippines - Nasakmit sa kapolisan ang usa ka gamay nga bomba nga gisulod sa lata nga adunay pulbora, lansang ug mga bildong buak gikan sa usa ka ulitawo didto sa atubangan sa discohan sa barangay Poblacion, lungsod sa Cordova sa miaging Sabado sa gabii.
Si PO1 Ryan Casiban sa kapolisan sa maong lungsod nga nahinabi sa Banat News miila sa nadakpan nga mao si Joseph Casibas Balboa, 18, ulitawo nga taga sitio Puso, barangay Poblacion sa maong lungsod.
Matud pa niya nga ang nakadakop sa maong suspetsado mao sila si SPO2 Marcelo Cometa ug PO2 Dennis Canomay kinsa maoy nakatubag sa alarma sa pagpamato.
Ang nasabak sa bato mao si Alvin Cantino Durangparag, 17, nga taga barangay Cogon sa maong lungsod.
Si PO1 Casiban miingon nga si Dugangparag gikan nga mitan-aw sa disco ug dihang migawas kini sa discohan kalit lang mihagtok ang bato sa iyang bagol-bagol ug nasamad kini.
Nagkadugo ang ulo sa biktima nga misumbong sa buhatan sa kapolisan hinungdan nga gisusi dayon nila ni SPO2 Cometa ug PO2 Canomay ang maong lugar.
Sa ilang pag-abot didto nasigpatan nila si Balboa nga nagpahipi sa ngitngit nga bahin sa gawas sa maong diskohan nga nagdala og plastic bag.
Sa dihang ilang gisil-ing ang dala niining plastic bag maoy ilang nakita ang usa ka improvised bomb nga gisulod sa lata nga puno sa pulbora, mga pinong lansang ug mga bildong buak, hinungdan nga ila dayon kining gisakmit. (Romeo T. Limpangog/WC) (BANAT NEWS)