CEBU, Philippines - Pakyas ug sa prisohan hinuon ang destinasyon sa usa ka 22- anyos nga ulitawo nga hubog nga gipasanginlang misuway og lugos sa usa ka magtutudlo sa ngitngit nga bahin sa Sitio Bontoy sa barangay Ticad sa lungsod sa Bantayan niadtong Biyernes sa alas 8:45 sa gabii. Ang biktima 46- anyos nga maestra nga nagpuyo sa maong barangay nagtudlo sa elementarya sa maong lugar. Samtang bugnaw nga kabilya sa prisohan na ang gihiram sa suspek nga si Clary Camposano, 22 , nga silingan ra sa biktima. Matud ni PO3 Lou Susvilla sa Bantayan Police Station dihang nahinabi sa Banat News nga nag-atang daan ang suspek sa biktima nianang adlawan pa.
Sumala pa nga miapas ang biktima sa bana niini nga nalangay og uli apan pag-abot sa nahitaboan gibabagan kini sa suspek nga nag-brief na lang dayong bitad sa biktima ug dihang milugnot gisumbag ang tiyan niini ug gisuwayan og guyod sa kalibonan.
Ang biktima nga nagbitbit og flashlight niadtong higayuna mipuspos niini sa ulo sa suspek dungan ang pagsinggit pangayo og tabang, naatlan nga mao say pag-agi sa bana sa biktima nga padulong na pauli ug nakadungog sa singgit sa tingog sa asawa dali kining miresponde.
Ang suspek sa kahadlok tulin pa sa manatad nga midagan apan pagkaalas 12:00 sa udto gidakop kini sa kapolisan human positibong gitumbok sa maestra. (EIM)(BANAT NEWS)