120 ka Pinoy naipit sa Gaza Strip
CEBU, Philippines - Nabutang karon sa peligro ang kinabuhi sa 120 ka mga Filipino nga naipit sa giyera tali sa mga militanteng Hamas ug tropa sa Israel diha sa Gaza Strip human giingong gipugngan sa mga militante nga makagawas sa ilang lugar.
Sumala pa sa report sa GMA News Online ang embahada sa Israel mipagawas og pamahayag nga gibuksan sa ilang nasud ang ilang utlanan alang niadtong mga buot nga mobakwit apan gibabagan sa mga Hamas.
“Concerned, Israel has an open crossing for those who wish to leave Gaza – but is blocked by Hamas,” sumala pa sa statement sa Israeli embassy sa Manila.
“Hamas is also holding hostage a number of foreigners that would like to leave the Gaza, amid the ongoing events. Even the 120 Filipinos in Gaza have difficulty in leaving,” matud pa sa pamahayag.
Ang giyera tali sa Israel ug Hamas sa Palestine nag-ugat kaniadto pang tuig 1948 dihang mibalik ang mga Hudiyo sa Israel nga maoy nalatid sa Bibliya nga yutang gisaad kanila sa Ginoo, naapil sa teritoryo ang yuta sa mga Palestino.
Niadtong Nov. 14, 2012 usa ka opensiba nga gitawag og Operation Pillar of Defense ang gilusad sa Israel tungod sa pagpaulan sa Hamas gikan sa Gaza og mga rockets ngadto sa teritoryo sa Israel.
Ang resulta sa pag-atake, namatay ang Hamas military commander nga si Ahmad Jabari kinsa nalakip sa listahan sa Israel nga most wanted terrorist gumikan sa kalambigitan niini sa nagkadaiyang pagpangatake ug kidnapping sa mga sundalong Israeli ilabi na si Gilad Schalit niadtong 2006.
Ang Pilipinas miplastada na sa Rapid Response Team diha sa mga utlanan sa Israel ug Egypt aron motabang sa paghakot sa mga Filipinong naipit sa maong giyera. Ang ambasador sa Israel dinhi sa Pilipinas nga si Menashe Bar-On mipasalig nga ilang dawaton ang mga Filipino ug uban pang mga langyaw gikan sa Gaza nga buot molikay sa giyera.
“Our border is open, Any foreigner who wish to cross the border from Gaza to Israel and Israel to Philippines we will assist them,” matud pa niini sa mga tigbalita.
“But we know that the Hamas is preventing foreigners... any foreigner, and I’m speaking not only of Filipinos, to leave Gaza. As I said they use their citizens and foreigners as human shields,” matud pa niya.( EIM) (BANAT NEWS)
- Latest
