CEBU, Philippines - Usa ka rerouting sa mga sakyanan pasaheroan sa siyudad sa Lapulapu ang ipatuman karong Nobiyembre 20 ug 21 nunot sa tinuig nga pangilin sa Birhen sa Regla sa maong siyudad.
Ang City Traffic Management System (CTMS) sa dakbayan sa Lapulapu pinangulohan ni Frank Brazil mipahibalo nga ang tanang mga pasaheroang may rota padulong sa dakbayan sa Mandaue ug siyudad sa Sugbo adto tanan magpakanaog ug pasakay og pasahero sa Terminal 3 sa usa ka dakong mall sa siyudad.
Samtang ang mga pasaheroan gikan sa Punta Engaño ug Marigondon adto kini moliko sa wala ug moliko na usab ngadto sa tuo sa Petron Gasoline Station sa barangay Basak ug molahos kini sa Hoopsdome nga maoy ilang magsilbing loading ug unloading area.
Sa ilang pagbalik sila moagi sa dalan Humay-Humay ug mosubay sa dalan Maximo Patalingjug Avenue ug moliko sa tuo subay sa Seawage Road ug moliko na usab ngadto sa wala paingon sa City Hall ug balik na ngadto sa ilang rota.
Ang mga traysikol nga nagbiyahe ngadto sa kabarangayan adunay kaugalingong mga parkingan sa Hoopsdome, Gusa, Pamas, eskina MECO, DAD CELAND ug ingon man sa Salvage sa barangay Looc sa maong dakbayan.
Si Brazil miingon nga ang mga sakyanan nga adunay 4,500 kilo ang gibug-aton gitugotan nga makasulod sa barangay Poblacion apan anha lang gyud pasubayon sa Mantawi Road, Lopez Jaena ug moliko sa dalan W. Risdon, R. dela Cerna ug dalan P. Rodriguez.
Gipahibalo usab ni Brazil nga gisira usab nila ang mga dalan paingon sa DM Dimataga nga naglakip niini ang Langub, Ompad, Mangubat ug F. Martires. (BANAT NEWS)