Napulo ka balay gikaon sa sunog

CEBU, Philippines - Napulo ka mga panimalay ang gikaon sa kalayo kagahapon diha sa barangay Suba dakbayan sa Sugbo pasado alas-7 sa buntag, walay gikatahong nasakitan sa mga molupyo gawas lang sa usa ka mahalong iro nga napaig sa maong sunog.

Ang maong sunog giisa ngadto na sa Task Force Alpha tungod usab sa kasikit  sa mga panimalay sa maong lugar.

Giingong unom ka panimalay ang hingpit nga naugdaw samtang ang upat niini ang nakan-an sa kalayo.

Matud pa ni Insp. Jose Laurito, Fire Investigator sa Bureau of Fire Protection sa siyudad sa Sugbo ila karong gisusi ang impormasyong nagsugod sa panimalay sa usa ka Danilo Borres ang sunog.

Gikatahong sa ikaduhang andana sa 3-storey nga balay kini nagsugod ug padayon pa nila karong gisusi ang hinungdan niini.

Gibanabana nga mokabat sa 700 mil ka pesos ang kantidad sa danyos sa maong sunog nga milanat og 25- minutos una pa makontrolar.

Nasayran usab nga ang iro nilang Borres nga si Putol nga usa ka poodle namatay dihang wala makagawas sa panimalay. (EIM)(BANAT NEWS)