Kepco gitagalan og usa ka buwan aron kurihian ang abog

CEBU, Philippines - Gihatagan og usa ka buwan ni Gob.Gwendolyn Garcia ang kadagkuan sa Korean Electric Power Cooperation-Salcon Power Corporation (KEPCO-SPC) sa pagbutang og net nga itabon sa ilang open yard diin gibutang ang coal nga sugnod sa coal fired power plant niini sa siyudad sa Naga.

Sa tigum nga gipatawag ni Garcia sa kadagkuan sa KEPCO-SPC gipasalig sa nahisgutan nga kompaniya sundon ang mando sa gobernador nga ang tumong mao nga mapugngan ang pagkadala sa abog niini sa hangin.

Ang pagbutang sa protective net sa kasamtangan nga 10 metros nga side barriers gisugyot tungod sa mga reklamo sa mga residente nga namulbos na sila og abog ug ilang gidudahan nga gikan kini sa open yard sa maong planta.

Gitataw sa General Manager for Community Relations and Environment sa maong planta nga si Victorio Naval nga duna silay responsibilidad sa katawhan ug usa sa polisiya sa planta ang pagpanalipod sa kalikopan ug sa komunidad ug dili lang isip usa ka supplier sa kuryente.

Pormal nga gipahibawo ni Naval sa mga sakop sa media nga gilibkas na ni Naga City Mayor Valdemar Chiong ang gi-isyu niining cease and desist order niadtong Nobiyembre 13 human nila masumiter ang usa ka action plan pagsulbad sa nahisgutan nga sitwasyon.  (BANAT NEWS)