CEBU, Philippines - Dako ang pangagpas ni Senatorial candidate Jack Enrile nga mapasar ug mahingpit nga balaod ang House Bill 6144 o “Domestic Workers Act” sa dili pa magsira ang 15th Congress.
“The House Bill 6144 is the result of all the consolidation of the several house bills by the different congressmen. This is a special law to address the peculiarity of the employment of these household helpers,” matud pang Enrile sa usa ka press conference kagahapon diha sa Grand Convention Center.
Matud pa ni Enrile nga ang maong balaudnon maghatag og dignidad sa mga katabang ug house boys ug maghatag og seguridad niining dugay nang wala matagad sa gobiyerno nga sektor sa mga mamumuo.
Ang maong balaudnon nagtinguhang mabutangan og patakaran ang pagpanarbaho sa mga katabang o kasambahay, kinahanglang mahatagan sila og mga benepisyo ug prebilihiyo sama na lang sa mga leave, sick leave, vacation leave, kontrata. Payslip, ug uban pa nga natagamtaman sa ubang sektor sa panarbaho. Dugang pa niini mao ang pagtahod sa ilang mga tawhanong katungod sama na lang sa panginahanglan og pagkaon ug kapuy-an, privacy, katungod sa komunikasyon, edukasyon ug pagbansaybansay ug uban pa.
Did-an usab ang mga agalon nga silotan ang ilang mga katabang pinaagi sa dili paghatag sa ilang mga panginahanglan, gidid-an usab ang mga katabang sa pagpanabi bahin sa personal nga impormasyon ug kalihokan sa ilang mga agalon samtang sila nagtrabaho o wala na kanila.
Gidili nga mahiktan sa utang ang katabang, dili pangayoan og deposito o bond ang katabang una pa dawaton sa trabaho, bawal ang pagdawat og menor de edad ug uban pa. Ang maong balaudnon naabot na sa bicameral level sa Kongreso ug gipaabot na lang ang diskusyon kabahin niini. Base sa bersyon sa Senado dili moubos sa P3,500 ang sweldo sa katabang sa Metro Manila, P3,000 sa mga chartered cities ug P2,500 sa ubang mga siyudad. (BANAT NEWS)