Driver napiit sa sakyanan patay

CEBU, Philippines - Patay ang drayber sa Isuzu Elf human mapiit  ang lawas sa  nadasmag  niyang sakyanan batok sa gikasugat niini nga Prime Mover didto sa highway sa barangay Canlumakad sa lungsod sa Santander niadtong Martes sa alas 4:45 sa hapon.

Ang biktima  mao si Carlito Requina Gamboa, 28, ulitawo,   nga taga barangay   Mantalongon, sa lungsod sa Dalaguete ug maoy drayber sa Isuzu Elf nga gipanag-iya  sa   Farmers Traders Corporation.

Samtang ang drayber sa gikadasmag niini nga Prime Mover  mao si Arturo Maningo Maigue, 54, minyo, nga  taga Hilamunan, Cabancalan City,  Negros Occidental.

Si PO3 Leonixto Solon sa Santander Police Station  mibutyag  sa Banat News  nga ang duha ka sakyanan naggikan  sa nagkasugat nga direksyon.

Ang Isuzu Elf gikan sa siyudad sa Sugbo ug paingon sa lungsod sa Badian samtang ang Prime Mover gikan sa Negros ug paingon sa syudad sa Sugbo, agi  sa barangay Bato, lungsod  sa Samboan. Apan  sa  pag-abot  sa duha  ka  mga  sakyanan  sa dapit  nga nahitaboan giingong  mibulhot  ang Isuzu Elf ug mi-suway og overtake  sa gisundan niya nga traysikol.

Apan  sa paningkamot  niini  nga  makauna  sa traysikol  mikawat  kini  sa pikas lane  sa karsada  nga mao  usay  pagguho  sa nagbagiyos  nga Prime Mover   ug sipa  kaayo  ang pagdinasmagay   sa duha ka sakyanan.

Tungod sa kakusog napiyapi ang simod  sa Elf hinungdan  sa pagkaipit  sa biktima  nga maoy nakaingon sa iyang hinanali nga kamatayon.

Samtang  ang  iyang  duha  ka helper  nga naglingkod  sa iyang tupad   nasuwertihan  nga  igo lang nakaangkon og ginagmay’ng pangos  sa ilang lawas. Matud ni PO3 Solon  nga dugay nakuha ang patay’ng lawas sa biktima tungod kay maayong pagkapiit niini.

Ang drayber sa Prime Mover mitahan usab dayon sa kapolisan ug  sa pagkakaron  nagtingkagol  na  sa prisohan samtang  gitakda  na  sa tagtungod  ang  pagsang-at  og kiha  batok kaniya . (BANAT NEWS)