DUMAGUETE CITY, Philippines – Gihingusgan sa siyudad sa Dumaguete ang kampanya batok sa mga pagpataka og butang og mga tindahan diha sa kadalanan ilabi na niadtong mga illegal vendors.
Ang siyudad mitukod sa Task Force SAGARR (Special Action Group Advocating Rapid Reform) aron gukdon ang mga ilegal nga mga naninda sa mga “paunay” o tabotabo nga karon daghan nang mga naninda.
Si Joey Abella sa Task Force SAGARR mibutyag nga ang maong kampanya tubag kini sa siyudad gumikan sa mga reklamo sa mga lehitimong mga vendors ug mga stallholders sa merkado publiko sa Dumaguete nga nakaapekto na sa ilang halin sumala pa sa gipagawas nga news release sa City Information Office sa maong siyudad.
Dugang pa ni Abella nga kadtong mga naghugpong nga mga vendors sa nagpwesto sa Pinili Street mao ray gitugotan sa siyudad nga makapaninda ug ang uban nga nagpwesto diha sa Colon ug Pinili Streets duol sa usa ka drugstore mga ilegal.
Nunot niini padayon ang gihimong surprisang inspeksyon sa kadalanan. Namatikdan nga midagsa na ang mga vendors sa kadalanan sa Dumaguete ilabi na sa Perdices Street nunot sa umaabot nga kapistahan sa siyudad ug sa Pasko. (/EIM) (BANAT NEWS)