CEBU, Philippines - Ang mga opisyales sa Department of Agriculture (DA-7) naningkamot sa paghatag og prayoridad ngadto sa mga high value crops sa rehiyon pinaagi sa pag-umol og mga programa sa pagpalambo niini.
Matud pa ni Ms. Nenita Seno, coordinator sa Regional High Value Crops Development Program 7 atol sa Kapihan sa PIA nga gisibya sa DYMR nga ilang gitagaan og dakong pagtagad ang pag-amuma sa mga tanom nga mahalon nga nakahatag usab og tukmang nutrisyon sa panglawas sa katawhan.
Dugang pa niya nga ilang gipaningkamutan nga mapalambo ang prutas sama sa mangga, guyabano ug nangka samtang sa mga utanon gihatagan nila og prayoridad ang mga gigamit sa pagluto og pinakbit ug usab chopseuy.
Gipadayag usab ni Seno nga ang mga lamas nga adunay taas nga presyo sama sa ahos ug sibuyas bombay ila usab nga gipausbaw tungod kay mao man gayud kini ang numero unong pangitaon sa pumapalit sa matag merkado tungod kay gamitonon man kaayo sa halos tanang matang nga pagkaon nga lutuon.
Gani gitug-an ni Seno nga aduna silay gitamnan nga 39 ka ektaryang yellow onion ug usab 20 ka ektaryang pula nga onion.
Samtang gihatagan usab nila og dakong pagtagad ang lagutmon sama sa kamote nga maoy gigamit nga panghulip sa kan-on ug lakip na usab ang saging nga Sab-a nga gipanglantawan nga maayo kaayo alang sa pagpahimsog sa kasing-kasing sa tawo.
Sumala pa ni Seno nga sa pagkakaron aduna nay nagsugod og pananom og Cacao ug Kape didto sa mga lungsod sa Alcoy, Balamban ug Asturias.
Gibutyag ni Seno nga gipaningkamutan nila nga sagopon ang organikong paagi pagpananom niining maong mga matang sa tanom sa tuyo nga dili madaot ang maayong panglawas sa mga tawo nga mokunsumo unya niining maong mga produkto.
Hinuon sa pagkakaron wala pa gayud kaayo mosagop ang mga mag-uuma sa organikong pagpananom apan ila gayud nga gipaningkamutan nga makumbinser ang mga mag-uuma.
Si Seno miingon nga aduna sila’y gipang-apud-apod nga mga materyales sa pagpananom sama sa seedling ngadto sa katawhan diin kadtong interesado kaayo nga mananom niining maong matang sa tanom mahimong moduol lamang sa buhatan sa DA-7 aron sila kahatagan gilayon sa maong mga liso.( /WC) (BANAT NEWS)