Abusado nga kawani sa DENR ipareport
CEBU, Philippines - Ang Department of Environment and Natural Resources (DENR-7) miaghat sa publiko sa pagtaho gilayon sa bisan unsang abuso o ilegal nga transaksyon nga nahimo sa ilang personnel ilabi na sa pagluwat og titulo sa yuta.
Ubos sa Republic Act 10023 o New Free Patent Act, ang DENR mohikay og aplikasyon sa pagpatitulo og patent sa yuta ni bisan kinsang Filipinong lungsuranon.
Giklaro ni DENR-7 Regional Executive Director Dr. Isabelo Montejo nga andam sila sa paghimo og lakang pinaagi sa pag-imbistigar sa mga kawani nila nga mangayo og kuwarta sa mga aplikante og titulo diin kun ilang mamatud-an ipahamtang nila niini ang tukmang silot.
Iyang gipasabot nga ang pagpatitulo og yuta may gitakda na nga bayronon sa aplikante apan kun may opisyal ug kawani sa DENR nga mangayo og sobra pa niini, andam sila sa pagsilot sa maong kawani kun mamatud-an.
Matud pa ni Montejo nga ang aplikante sa yuta kinahanglang mobayad og minimal nga kantidad nga P50 matag aplikasyon alang sa libreng patent, residential patent ug uban pang aplikasyon sa yuta.
Dugang pa ni Montejo nga mahimo silang motawag sa opisina sa Regional Executive Director sa numero nga 346 0661 o sa Regional Public Affairs Office sa numerong 345 3959 o kaha mo-file og letter of complaint ngadto kanila kung aduna silay gustong itaho aron kasugdan og pasiunang imbestigasyon.
Gipadayag ni Montejo nga iya nang gitugon ang ilang mga opisyales sa provincial and community environment and natural resources sa rehiyon 7 aron maoy mobantay ug magpaka-vigilante sa maong isyu.
Sumala pa ni Montejo nga ang ilang legal division gitahasan sa pagbuhat sa maong trabaho ug nga dili sila maulaw sa pagkastigo niadtong mga abusado,
Midugang siya nga andam sila sa pagpasaka og kasong administratiba batok sa mga salawayong empleyado.
Si bisan kinsang lungsoranon nga Filipino kinsa aktwal nga nagpuyo sa residential nga yuta sa dili momenus napulo ka tuig mahimong moapply og libreng patent title. (WC) (BANAT NEWS)
- Latest
