CEBU, Philippines - Ang kusog nga pagbunok sa ulan sayo sa miaging kaadlawon maoy hinungdan sa pagkanselar ang plan A sa fluvial procession sa imahen sa Mahal nga Birhen sa Regla, ug ang plan B maoy gipatuman.
Sa maong plano gipahigayon ang motorkada sa kadalanan , gikan sa barangay Suba-Basbas, Marigondon, Maribago, Mactan, Ibo, Buaya, Pusok, Pajo ug gitapos sa barangay Poblacion sa pagbalik na sa National Shrine sa Birhen sa Regla sa maong dakbayan.
Si Padre Jimmy Duero nga maoy kura paruko sa simbahan sa Birhen sa Regla nga maoy patron sa dakbayan maoy nangulo sa kaparian nga mikuyog sa maong motorkada ug gikuyogan usab kini sa mga opisyal sa dakbayan nga gipangulohan ni Mayor Paz Radaza, Vice Mayor Martial Ycong ug mga deboto niini.
Sa paghidangat sa imahen sa Mahal nga Birhen sa Regla sa iyang simbahan sa barangay Poblacion gisugat kini sa nagpaabot nga mga sakop sa konseho, mga barangay kapitan nga gipangulohan ni Association Barangay Council (ABC) Federation President Leo Mercado ug liboan usab ka mga deboto nga nagpaabot niini.
Human sa pagpahimutang sa imahen sa Mahal nga Birhen sa Regla sa pagbalik sa iyang naandang butanganang altar sa sulod sa maong simbahan gisugdan usab gilayon ang unang misa sa kapistahan nga gidumala ni Ricardo Cardinal Vidal nga maoy arsobispo emeritus sa Sugbo.
Si Cardinal sa iyang gihimong wali sa misa nga gipahigayon maoy iyang gipadayag ang kanunay nga paghiusa sa pagtuo ngadto sa Labaw nga Makagagahom ug ang magkausa unta kanunay kay sa maong paagi hingpit usab nga maangkon ang kalinaw.
Gihimong panag-ingnan ni Cardinal Vidal si San Pedro Calungsod nga nakahatag kaayo og dakong garbo dinhi sa Sugbo ug sa pagpakita sa hinog na nga pagtuo ngadto sa Ginoo nga maoy hinungdan sa naangkon niining grasya.
Sa nasayran nga ang motorkada sa imahen sa Birhen sa Regla nga gipahigayon maoy kabahin lamang sa daghan pa nga mga gihan-ay nga kalihokan hangtod sa adlaw sa iyang kapistahan karong Nobembre 20 ug 21 niining tuiga. (/WC) (BANAT NEWS)