Katapusang adlaw sa mosang-at og petisyon

CEBU, Philippines - Kutob nalang karung adlawa (Lunes) ang tagal pagpanawat sa Commission on Elections niadtong mga isang-at nga petisyon nga magkwestyon sa legalidad sa mga residensya sa usa ka botante nga mibalhin og parehistro ingon man nagparehistro sa usa ka lugar.

Matud ni Atty. Marchel Sarno, ang Cebu City Election Officer sa North District dihang nahinabi sa Banat News niadtong milabay'ng semana padayun pa karun silang nanawat sa mga petisyon may labot sa pagkwestyon sa residensya sa usa ka rehistradong botante.

Giklaro ni Sarno nga ang petisyon alang sa pagkwestyon sa residensya sa usa ka botante mao nalang karun ang ilang giatiman tungod kay napupos na ang tagal niadtong mokuwestiyon sa residensiya sa usa ka kandidatu.

Matud niya nga ubos sa lagda sa Comelec kadtong mobalhin og rehistro ingon man magparehistro sa usa ka lugar gikinahanglang nakapuyo kini og labing minus unom ka bulan sa lugar sa dili pa ang adlaw pagpahigayun sa eleksyon aron mahimo kining lihitimong botante.

Usa sa gipaabot nga kwestiyunon unya mao ang pagparehistro sa magsuong sa aktres nga si Ruffa Gutierrez, Richard Gutierrez ug Elvis ingon man amahan nila nga si Eddie Gutierrez nga mibalhin og rehistro sa north district dinhi sa dakbayan karung bag-o.

Matud pa sila buot nga mosuporta sa kandidatura sa ilang inahan nga si Anabelle Rama nga mikandidato pagkakongresista atbang ni kanhi kongresista Raul Del Mar sa North District.

Sumala pa ni Sarno nga kun way masang-at nga petisyon batok sa usa ka botante magpabilin kining lehitimong botante bisan pa kun dunay mga nagduda sa residensiya niini.

Giklaro sab niya nga kun dunay petisyon nga masang-at sa ilang buhatan iduso nila kini sa Comelec Manila aron maoy mopakanaug sa desisyon. (Darrel A. Carumba/EIM) (BANAT NEWS)