Fluvial Procession sa Birhen sa Regla karong adlaw

CEBU, Philippines - Magpanon sa kadagatan sayo sa buntag karong adlawa ang mga nagkadaiyang sakyanan sa kadagatan nga napuno sa dayan-dayan nga mokuyog sa fluvial procession sa imahen sa Mahal nga Birhen sa Regla nga maoy patron sa dakbayan sa Lapulapu nga magsaulog sa iyang tinuig nga pangilin sa Nobiyembre 20 ug 21 niining tuiga.

Ang fluvial procession nga sugdan sayo sa kaadlawon pinaagi sa usa ka Santos nga Misa sa simbahan sa parokya sa barangay Marigondon nga tambongan usab sa gatusan ka mga deboto gikan sa sikbit nga kabarangayan nga naglakip sa barangay Basak, Suba-Basbas, Agus ug Maribago.

Ang pagprosesyon sa imahen sa Mahal nga Birhen sa Regla sugdan sa alas-7 ang takna sa buntag nga manukad sa kadagatan sa barangay Suba-Basbas.

Ang imahen gisakay sa usa ka dako nga motorbanca ug molibot ang fluvial procession sa kadagatan sa barangay Marigondon, barangay Agus ug barangay Maribago nga diin gipaabot maglumbay usab ang mga molupyo sa daplin sa kabaybayonan.

Si Senior Superintendent Rey Lyndon Lawas, nga maoy direktor sa kapolisan sa maong dakbayan mopakatap unya og mga polis sa siyudad atol sa maong selebrasyon.

Atol unya sa fluvial procession gipahimangnoan ang manguyog ug ang mga manan-aw sa kabaybayonan nga dili magbuto sama sa ilang naandan aron malikay sa mga aksidente ang mga tawo.

Ang Philippine Coast Guard maoy gitahasan sa hapsay ug luwas nga pagbiyahe sa mga motorbanca ug ang pagpahimangno sa mga barko diha sa Mactan Channel.

Ang fluvial procession motadlas sa Mactan Channel adto molabay sa mga barangay Mactan, Ibo, Buaya, Pusok Pajo ug modunggo sa Mulle Osmeña Wharf sa Poblacion ug kini sugaton sa magtiayong sila si Mayor Paz Radaza ug Kong. Arturo Radaza inubanan sa mga konsehal ug opisyales sa dakbayan ug mga kaparian ug mga layko. (Romeo T. Limpangog/EIM) (BANAT NEWS)