4 'karnaper' gikasohan

CEBU, Philippines - Gipasakaan na og kaso ang upat ka mga suspetsadong carnappers nga nadakpan sa hiniusang pwersa sa kapolisan sa Mandaue City Police Office ug Cebu City Police Office diha sa dalan Avocado, barangay Mambaling sa dakbayan sa Sugbo niadtong miaging hapon.

Ang gipasakaan og kaso mao ang tulo ka mga kauban nga nadakpan nga sila si Rannie Dandan, 34, Johnriel Cosido, 28, Floriano Conde, 25, ug ang menor de edad nga pulos taga dalan Avocado sa barangay Mambaling sa dakbayan sa Sugbo.

Si Chief Inspector Michael Anthony Bastes, hepe sa Investigation Detection and Management Bureau (IDMB) sa MCPO mitug-an nga ang upat ka dinakpan maoy suspetsado sa pag-carnap sa Kia Pride nga nagdala sa plate number nga GPV 582 nga gipanag-iya ni Juvy Sanoria nga taga dakbayan sa Lapulapu.

Matud pa ni Bastes nga gi-parking sa biktima ang maong sakyanan sa daplin sa karsada sa reclamation area kay nagkuha kini sa iyang anak nga nagtungha sa usa ka tunghaan sa maong dapit dihang sa ilang pagbalik gimaneho na og laing tawo ang iyang sakyanan.

Si PO3 Marvin Fegarido, imbestigador sa IDMB sa MCPO nga nahinabi sa Banat News miingon nga gisusi karon nila ang nahipos nga kasayuran nga ang mao nilang dinakpan sakop usab sa Duminguez carnapping group nga giingong banggiitang carnapper nga naglihok sa Central Luzon. (/EIM) (BANAT NEWS)