Armadong mga tawo sikop

CEBU, Philippines - Nasikop sa kapulisan ang tulo ka lalaki ug usa ka babaye nga gidudahang usa ka organisadong grupo sa mga kriminal ug nakuhaan og nagkadaiyang drug paraphernalia ug duha ka armas diha sa sulod sa usa ka lodging house sa sitio Galong, sa Barangay Poblacion, lungsod sa Alegria kagahapon sa buntag.

Ang mga suspetsado nga sila si Francisco Villanueva, 31; Gerondio Lanticse, 33; Irene Responso, 23, pulos taga-Barangay Pulpugan, Consolacion, ug Rene Boy Tariao, 39, nga taga Barangay Poblacion, Danao City, kinsa gihulagway nga kadudaha’g lihok  maong gisumbong ngadto sa kapolisan.

Gipangita pa sa kapolisan ang ikalimang kauban sa grupo nga naila lang sa pangalang “Awing” kinsa wala diha sa maong lodging house dihang naabtan sa mga polis.

Ang kapulisan nagduda nga posibleng mga gun-for-hires ug nalambigit sa ilegal nga drugas ang grupo tungod sa mga nakuha nila gikan sa grupo.

Laing mga ebidensiya mao ang usa ka bonnet, notebook nga giingong listahan sa utangan sa shabu, bullet proof, lima ka cellphone, awto nga Toyota Vios  (YGP-223), Honda Wave  motorcycle (TP7TC02606), duha ka kalibre .45 pistols nga adunay 25 ka mga bala ug upat ka magazine.

Si Insp. Sandy Roble, hepe sa Alegria Police Station, nagkanayon nga dali nilang giadto ang lodging house human sila makadawat og tawag kabahin sa maong tawong kadudahan kaayo ang lihok.

Si Engr. Tito Cavalida, chairman sa Alegria Traffic Operation Management Board, miingon nga nakadawat sila og report nga nianang mga alas 11:00 sa Lunes sa gabii giingong mi-check-in ang grupo sa maong lodging house.

Ang hepe sa kapulisan sa lalawigan sa Sugbo, Sr. Supt. Patrocinio Comendador, nakadawat usab og taho nga ang maong grupo nakapusil sa Consolacion apan ila pa kining gi-verify.

Si Comendador nagpadala na og intelligence operatives sa Alegria aron motabang sa pag-imbestigar sa maong grupo. Niabag na usab ang kapulisan sa Consolacion.

“Dili nato igsapayan ako nang gipadad-an og intel operatives aron motabang sa investigation,” matud ni Comendador.

Ang mga suspetsado gibalhog na karon sa karsel sa Alegria samtang kasong ilegal nga paghupot og armas ug paghupot og ilegal nga drugas ug drug paraphernalia ang ipasaka batok sa grupo.

Ang Banat News nakadawat og text message gikan sa wala magpailang tawo nga mitumbok sa grupo nga mga ‘hitman’ sa usa ka politiko sa habagatang bahin sa Sugbo ug dunay mga agalong polis ang mga suspek. (BANAT NEWS)