CEBU, Philippines - Midangop sa kapolisan ang usa ka inahan kay iyang gisumbong ang iyang anak nga miunay ra og kawat sa P200 mil niyang mga alahas sa ilang balay sa barangay Bacayan ning dakbayan sa miaging gabii. Ang biktima mao si Juana Flores, 62, usa ka trabahante sa Deca Homes, samtang ang suspek nga iyang gipasanginlan mao si Erwin Flores, 40, nga iyang anak.
Ang biktima uban sa iyang apo nga anak usab sa suspetsado personal nga mitaho ning maong kaso ngadto sa kapolisan sa Theft and Robbery Section sa Cebu City Police Office kagahapon.
Matud pa sa biktima nga nahitabo ang maong kawat niadtong Sabado sa gabii dihang pag-uli niya gikan sa trabaho nawala na ang iyang mga alahas nga balor og P200 mil sa gibutangan niini.
Gawas nga nawagtang ang maong mga butang, nakuyat-ag usab ang mga butang sulod sa iyang kuwarto ug ang kisame niini naguba na. Gipangita niya ang suspetsado kinsa gikan pa sa rehabilitation center gumikan sa pagka-drug addict niini, apan wala na niya igkita hinungdan nga midangop siya sa buhatan sa kapolisan.
Matud pa sa biktima nga ikaduha na kining higayon nga giunay og kawat sa iyang anak ang iyang mga alahas.
Ang unang higayon balor og P500 mil ang alahas nga gisakiyo niini, ug gawas sa maong pagpangawat, ang ilang duha ka sakyanan giingon nga giprenda usab sa suspetsado, matud pa sa biktima. Gusto sa biktima nga ipasikop sa kapolisan ang suspek apan wala pa siya kadesider kun pasakaan ba niya kini og kaso. (Lesley Caminade-Vestil/WC)(BANAT NEWS)