Naglung-ag nakatug, bay nasunog
CEBU, Philippines - Gumikan kay nakatulog samtang nanglung-ag, mi-overheat ang stove nga maoy hinungdan nga hapit maugdaw ang usa ka balay didto sa Block 2 sa Tierra Grande, Santa Lucia Subdivision, barangay Lawaan I, dakbayan sa Talisay kagahapon pasado alas 11:00 sa buntag.
Apan ang alarma sa maong sunog nadawat sa kapolisan mga alas 12:00 na sa udto gikan sa report sa usa sa mga residente sa maong lugar nga si Sandy Pilayre.
Ang nakadawat sa maong report pinaagi sa telepono mao ang mga tinugyanan sa Talisay City Fire Station.
Ang nasunog nga balay gipanag-iya ni Edilberto Luage Timtim, hingkod. Hinuon bisan naglisud na pagginhawa ang maong tag-iya gumikan sa pagpuot sa aso sa sulod sa ilang kusina , apan nakalingkawas gihapon gikan sa peligrong kahimtang sa maong higayon. Si SFO2 Felipe Abarquez nga nahinabi sa Banat News nagkanayon nga base sa ilang imbestigasyon nasuta nga sa wala pa mahitabo ang sunog si Timtim nga nag-inusara sa maong higayon nagluto og pagkaon alang sa iyang paniudto.
Samtang nagtak-ang sa iyang giluto sa stove, nakatulog kuno kini hangtud nga giingong mi-overheat ang stove hinungdan nga ang plywood nga lamesang gipatungan niini misilaob ug midakop ngadto sa plastic tray sa mga plato ug miulbo ang kayo ngadto sa kesame sa kusina. Si Timtim giingong nakamata kini tungod sa kapuot na sa aso sa sulod sa iyang balay ug dali kining migawas.
Ang mga silingan ni Timtim daling mitabang sa pagpawong sa kayo pinaagi sa paggamit og mga balde ug uban pang sudlanan og tubig. Si Abarquez mibutyag nga pag-abot nila sa lugar napawong na ang kayo ug usa sa ilang problema sa pag-alarma tungod kay nasaag sila sa kadaghang mga eskina sa maong subdivision ug walay spotter nga mitudlo kanila sa esksaktong lokasyon.
Midugang kini nga ang caller wala usab mohatag og hustong lugar o block sa maong subdivision samtang ang mga tawo nga ilang gipangutana pulos lang nangambot.
Hinuon gibana-banang P5,000 lang ang danyos sa maong sunog. (Brenda D. Batuto/WC)(BANAT NEWS)
- Latest
