CEBU, Philippines - Mga manindahay diha daplin sa karsada sa sementeryo sa barangay Poblacion, dakbayan sa Talisay usa sa mga problema nga nakabalda sa agianan matud sa hepe sa Talisay City Police Station nga si Superintendent Eddie Recamara.
Si Recamara nga nahinabi sa mga tigbalita kagahapon nagkanayon nga wala sila’y mga problemang nasugatan diha sulod sa mga sementeryo sa Talisay gawas lang sa mga publikong sementeryo sa Poblacion diin ang mga vendors nag-ali na sa agianan.
Matud sa hepe nga mga alas 6:00 kagahapon sa buntag nagpahigayon sila og dry run sa pag-agi sa ambulansiya sa Talisay Rescue Emergency Action Team (TREAT) ug sa police patrol car pangandam ugaling dunay mahitabong emerhensiya.
Ang karsada paingon ngadto sa maong sementeryo hagip-ot nang daan ug misamot pa kini og kaapiki tungod sa mga manindahay og mga buwak ug kandila. Gihangyo ni Recamara ang mga vendors nga di maninda diha sa agianan apan giingong nagmagahi ug miinsister nga gitugotan sila sa opisyal sa barangay sa ilang pagpaninda sa maong dapit.
Ang mga polis ug mga tanod gikan kagahapon sa buntag hangtud ugma sa gabii magbantay sa mga sementeryo nga gidagsaan na sa mga tawong mibisita sa ilang mga minahal sa kinabuhi nga mitaliwan na. (EIM) (BANAT NEWS)