CEBU, Philippines - Panghinaut ni Mayor Michael Rama nga magmalinawon gihapon karong adlawa ang pagsaulog sa Adlaw sa mga Minatay sama sa nahitabo kagahapon nga wala’y mga dagkong kagubot nga nahitabo sa siyudad sa Sugbo nga may kalabotan sa nahisgutang okasyon.
Nagkanayon si Rama nga usa sa iyang formula sa dugay na nga katuigan mao nga gawas sa mga sam-ang pabantayan usab ang mga convenience stores, pawnshops, gasolinahan, malls, money changers, cellphone shops ug uban pa nga pampublikong lugar.
Napanglantawang modagsa ang mga tawo diha sa mga sam-ang ug magmingaw ang pipila ka dapit sa siyudad ilabi na sa mga lugar diin mahimutang ang mga negosyo.
Pabilin gihapon nga nakaalerto hangtud ugmang adlawa, Nobiyembre 3 ang kapolisan sanglit adunay ubang tawo nga liwas na sa kalag-kalag mobisita sa ilang mga minahal sa kinabuhi aron malikay sa bagang duot sa katawhan.
Samtang ang Cebu City Traffic Operations Management (Citom) nga gipangulohan ni Atty. Rafael Yap padayong mihangyo sa publiko nga motuman lang gyud sa traffic signs nga gibutang sa kadalanan ug kadtong adunay kaugalingong sakyanan mas maayong ma-commute nalang aron di mahasol sa kaparkingan. (/EIM) (BANAT NEWS)