Nakapatay sa babaye sa Subangdaku gipangita

CEBU, Philippines - Nailhan na  sa kapolisan  ang  tawong  nakapusil patay  sa usa  ka babaye  nga naglingkod sa  daplin  sa  karsada sa sitio Marna sa barangay Subangdaku, dakbayan sa Mandaue sa miaging  kaadlawon.

Kini ang nasayran sa Banat News gikan kang SPO3 Marcos Noval sa Investigation Detection and Management Bureau (IDMB) sa Mandaue City Police Office (MCPO)  kagahapon.

Matud pa ni SPO3 Noval nga usa ka Jesson (bansagon gipugngan) nga taga lungsod sa Ronda sa habagatang bahin sa lalawigan sa Sugbo maoy  giingong nakapusil  patay  kang  Jessel Magalzo, 28, minyo nga  nagpuyo  sa maong  dapit.

Kini  samtang  naglingkod  si Magalzo  daplin  sa  karsada  ug nahiagi si Mario Arasia, 32, nga  taga  barangay  Mabolo, dakbayan  sa Sugbo, nga  nagdagan  nga  gigukod  ug  gipusil  sa  suspetsado.

Apan  nasuta  sa  mga  saksi  nga  ang  usa  ka bala  nga alang  unta  kang Arasia  didto  motaroy  sa tiyan  ni Magalzo  nga  maoy nakaingon  sa kamatayon  niini.

Nasayran  nga  sa maong higayon si Magalzo  nagpaabot  sa iyang  bana  gikan  sa trabaho.

Matud pa ni SPO3 Noval nga ang  mga tawo nga nakakita sa maong pagpamusil positibong  miila sa suspetsado ug   gikompirmar  usab  kini ni  Arasia.

Si SPO3 Noval miingon nga si Arasia nga nagpaalim pa sa iyang samad pinusilan sa Vicente Sotto Memorial Medical Center sa dakbayan sa Sugbo wala pa makahatag og kasayuran ngadto kanila  nganong  gipusil  siya  ni Jesson  sa maong higayon

Hinuon  gipangita  na  karon  sa kapolisan  ang suspetsado  aron  manubag  kini  sa sala  nga  iyang  nahimo. (WC)  (BANAT NEWS)