CEBU, Philippines - Kasong kidnap for ransom ang gipasaka batok sa tulo ka Filipino ug usa ka Koreano nga misuway sa pagdagit sa usa ka Koreano ug sa kapuyo niini niadtong miaging Miyerkules.
Ang mga suspetsado nga sila si Song Sungheum, Leonard Bulabon, Gregorio Dealagdon ug Richard Dealagdon maoy gipaubos sa inquest proceedings kagahapon sa buntag.
Ang hepe sa kapolisan sa syudad sa Sugbo nga si Sr. Supt. Melvin Buenafe mibutyag nga padayon pa sila karon nga nakig-alayon sa nasud sa Korea kalabot sa background sa suspetsadong Koreano
Gawas niini, gisusi usab sa kapolisan kun aduna bay kalambigitan sa grupo sa sindikato ang mga suspetsado.
Gibutyag usab ni Buenafe nga menos ra kaayo ang reklamo batok sa mga Korean national dinhi sa Sugbo busa maglisud sila sa pagsulbad dayon sa maong kaso.
Kahinumdoman nga niadtong Miyerkules sa buntag gikatahong gikuha ug gipasakay og sakyanan sa mga suspetsadong Filipino ang biktima nga sila si Jun Hyung Chung ug ang kapuyo niini nga si Charise Santiago sa ilang apartment sa pasangil nga aduna kunoy mireklamo batok kanila.
Samtang nagsakay sila sa sakyanan, gikuha sa usa sa mga suspetsado ang ATM Card sa Koreanong biktima ug gimandoan kini nga mo-withdraw og kuwarta bugti sa ilang kagawasan gikan sa ilang pagkadagit. Busa mi-withdraw og P195 mil ang biktima isip pasiunang bayad sa ransom nga gipangayo sa mga suspetsado.
Matud pa sa kapolisan P600 mil ang gipangayo sa mga suspetsado ngadto sa biktima alang sa kagawasan niini uban sa iyang kapuyo. Hinuon nagpahayahay na sila karon sa prisohan human sila hidakpi sa mga otoridad.(Lesley Caminade-Vestil/WC) (BANAT NEWS)