CEBU, Philippines – Igo na lang pagsumbong sa kapolisan sa lungsod sa Consolacion ang tulo ka Haponesa nga nabiktima sa pagpangawat sulod sa usa ka kan-anan sa mall sa maong lungsod pasado alas 4 sa nakalabay nga hapon.
Ang mga biktima naila nga si Maki Morozum, 34; Akiko Ueda, 29; ug Nozomi Hayase, 29, pulos kasamtangan nga nagpuyo sa barangay Talamban, dakbayan sa Sugbo.
Matud pa ni SPO1 Francisco Perez, desk officer sa Consolacion Police Station, nga ang guwardiya sa mall nga si Joy Villacarlos ang nagkuyog sa tulo ka Haponesa sa ilang buhatan.
Sumala pa ni Perez nga samtang nangaon sulod sa fast food chain ang tulo ka langyaw, kalit lang niabot ang mga kawatan ug sa ilang pagkalipat nawala na ang ilang bag nga duna’y sulod nga mga mahalong gamit.
Ang guwardiya nitug-an nga sa close circuit television (CCTV) camera, ilang nakita ang tulo ka lalaki ug duha ka babaye nga pulos mga batan-on nga maoy nagkuha sa butang sa mga langyaw ug nagdali sa pagpanggawas gikan sa mall.
Nadala sa mga kawatan ang P3,500, Casio nga camera kantidad og 20,000 yen, 40,000 yen cash, passport ug ubang dokumento.
Si Perez niingon nga ang maong hitabo mao’y mudos sa mga kawatan ilabi na kung makakita nga dunay mga langyaw nga dili kaayo mag-atiman sa ilang mga butang. BANAT NEWS