CEBU, Philippines - Gihangyo sa kadagkoan sa Department of Education ang Kapitolyo nga mabutangan na sila og kaugalingong buhatan.
Kini ang tumong sa pagpakigtagbo nilang DepEd Cebu provincial schools division superintendent, Dr. Arden Monisit, ug kaubanan kang Gob. Hilario Davide III kagahapon.
Ang buhatan sa DepEd Cebu Province Division kasamtangang gipahimutang sa building sa Provincial Health Office sa Sudlon, Lahug, Dakbayan sa Sugbo human naguba sa linog ang ilang buhatan sa sulod sa Capitol compound.
Laing gipadayag sa mga opisyal sa DepEd ngadto kang Davide ang ilang hangyo nga mahatagan og dugang magtutudlo ingon man mga lawak-saringan.
Matud ni Monisit nga dakung problema nila karon ang kakuwang sa mga magtutudlo sa pipila ka pangpublikong tunghaan sa probinsiya.
Samtang ang mga magtutudlo ubos sa Alternative Learning System mihangyo usab og dugang allowance gikan sa Kapitolyo alang sa ilang pagbiyahe ilabi na sa kabukiran.
Gipadayag ni Corazon Comar, district supervisor sa ALS, nga adunay P2,000 nga allowance ang ilang mga magtutudlo apan kuwang kini sa pamplete ug uban pa nilang panginahanglan.
Sa miaging tuig aduna’y 11 mil ka mga estudyante sa ALS sa tibuok Probinsya sa Sugbo ug karong tuiga mikabat na kini sa kapin 13 mil.
Nihangyo usab ang grupo ngadto kang Davide nga mahatagan sila og sakyanan.
Si Davide miingon nga iyang ipadangat sa Provincial School Board ang maong mga hangyo. (/GMR)(BANAT NEWS)