CEBU, Philippines - Ang Commission on Election (Comelec) sa dakbayan sa Talisay nanawagan sa mga magparehistro nga sa Oktubre 31, 2012 na lang ang kataposang adlaw sa pagdawat nila sa magparehistro gikan sa alas 8:00 sa buntag hangtud sa alas 5:00 sa hapon ug wala na kini extension. Si Corazon Moran, Comelec officer sa Talisay mipahibawo nga gikan sa Oktobre 29 hangtud sa 31 sa People’s hall sa siyudad sila manawat sa magparehistro aron dili kini maghuot.
Si Moran mihangyo usab sa mga konsehal sa siyudad nga ipahibawo ang maong kasayoran sa mga residente sa ilang mga barangay.
Matud ni Moran nga sa milabay’ng mga buwan nagpahigayon sila og offsite registration sa 22 ka mga barangay sa Talisay apan pipila lang ang nagparehistro.
Apan karong hapit na mapupos ang mga adlaw sa rehistrasyon nagdasok na kini sa pagduaw sa ilang buhatan, sumala ni Moran. (Brenda D. Batuto/WC) (BANAT NEWS)