CEBU, Philippines - Talandugon ang kahimtang sa usa ka lalaki human pusila sa iyang kainom sulod sa usa ka bar sa sitio Gaymakers, barangay Perelos Carcar, sa miaging gabii.
Ang biktima nailhan nga si Gerald Panugaling, 29, nga taga Poblacion 1, samtang ang suspetsado nailhan usab nga si Rodel Quijano, hingkod, nga taga Upper Tawog, barangay Valladolid.
Sa pasiunang imbestigasyon sa kapolisan nasayran nga ang biktima ug ang suspetsado nagkalalis dihang nangalasbag na sa ilang panag-inom sulod sa bar. Apan dihang gilupig sa katarungan ang suspek kalit kining milanit sa iyang armas de fuego ug giluthang ang tiyan sa biktima.
Human mahagba ang biktima milayas dayon ang suspek samtang ang biktima gihatud usab dayon sa mga nakasaksi ngadto sa tambalanan sa dakbayan sa Sugbo.
Ang suspetsado ug ang asawa niini, midangop kang SPO1 Irving Paterno Avila diin kini boluntaryo nga mitahan.
Sa pagkakaron nagpahayahay na sa prisohan ang suspek samtang gihikay na ang tukmang kaso nga isang-at batok kaniya. (Lesley Caminade-Vestil/WC) (BANAT NEWS)