15-anyos gikaligo og bala nabugto

CEBU, Philippines - Patay ang 15- anyos nga batan-ong lalaki nga gidudahang kawatan human kini gipusil makadaghang higayon samtang naglakaw sa dalan kauban sa iyang mga barkada sa barangay road sa sitio Saksak, barangay Abucayan sa lungsod sa Balamban niadtong Sabado sa alas 6:50 sa gabii.

Ang biktima mao si Justin Langga, 15, wala magtungha ug estambay sa maong lugar ug nagpuyo gihapon sa maong dapit.

Samtang ang suspek gihulagway lang sa mga batan-ong saksi nga nagsuot og kawo ug nag-jacket og kolor puwa nga nakamaong pants.

Matud ni PO2 Godofredo Dumdum, desk officer sa Balamban Police Station dihang nahinabi sa Banat News giingong naghupohupo na sa ngitngit nga bahin sa maong lugar ang mamumuno ug dihang nakaduol na ang biktima kalit kining gipusil.

Sa ilang kahadlok mikaratil sila og panagan ug nabiyaan ang biktima nga gitusaktusak sa bala. Ang mamumuno gituohang misum-ok og balik sa kalibunan.

Nangayo sila og panabang sa mga molupyo sa lugar ug gihatud ang biktima sa Balamban District Hospital apan patay na kini.

Ang kapulisan nga miresponde sa crime scene nakapunit og upat ka kabhang sa bala sa kalibre .45 nga gituohang gikan sa armas nga gigamit sa suspek.

Subay sa nagpadayong imbestigasyon sa kapulisan ang biktima gitumbok nga manghilabot og mga CDI sa mga motorsiklo diha sa maong lugar.

Nahibaw-an usab sa pakisusi sa kapulisan nga ang maguwang sa biktima nga gitago lang ang pangalan napriso karun sa Cebu Provincial Detention and Rehabilitation Center tungod gihapon sa pagpangawat og CDI sa motor.

Padayun pa ang manhunt operation sa kapulisan pag-ila og pagsikop sa suspek. (Darrel A. Carumba/EIM) (BANAT NEWS)