CEBU, Philippines - Mokabat sa 1,000 ka mga batang anak sa kabus nga ginikanan sa kabarangayan maoy makapahimulos gikan sa salapi nga kitaon sa horror booth sa dakbayan sa Mandaue nga magsugod na sa iyang pagbukas karong Lunes sa Oktobre 29 niining tuiga.
Ang horror booth nga pasiugdahan sa kagamhanan sa maong dakbayan nga ipahimutang sa sulod sa Mandaue City Sports and Cultural Complex sa sitio Tribunal sa barangay Centro pagaapilan kini sa mga piniling mga Mandauehanon nga maoy nagsilbing mga kalag, mga maligno, engkanto, ungo, balbal ug uban pa nga makalilisang ang mga panagway.
Dunay P20 matag tiket nga mapalit una pa makasulod sa horror booth nga ikaunom na karon ka tuig nga gihimo sa siyudad sa Mandaue nga giulohan sukad pa kaniadto og “Kahadlok Mo, Pinaskohan Ko.”
Kini himuon pahaom pagsaulog sa Todos Los Santos ug Adlaw sa mga Kalag gisuportahan usab kini sa Kaabag Mandaue Foundation.
Si Engineer Emeterio Cabilao nga maoy presidente sa Kaabag Mandaue Foundation mibutyag sa mga tigbalita nga labing makalingaw ang horror booth sa dakbayan karong tuiga tungod kay daghan man silang bag-ong ipakita.
Ang unang ginang sa dakbayan nga si Sarah Cortes ug mao usab ang chairperson sa Mandaue City Committee for the Protection of Children mao unyay motunol sa pinaskuhan sa mga kabataang kabus sa ilang pinaskuhan nga mapalit gikan sa kitaon sa horror booth karong Disyembre 21 niining tuiga.
Niadtong miaging tuig 2011 ang horror booth sa dakbayan nakatigom og P279, 414 nga na-doble itandi sa P162, 863 nga kita sa tuig 2010. (Romeo T. Limpangog/EIM) (BANAT NEWS)