CEBU, Philippines - Duha ka balaodnon sa Ubos Balay Balaoranan gipaabot nga mosulbad sa reklamo sa mga pre-paid mobile subscribers batok niining “nakaw load” sa mga telecommunications company.
Ang mga balaodnon nilang mga Kongresista Lord Allan Jay Velasco sa Marinduque ug Jose Victor “JV” Ejercito sa San Juan gitumong aron kaprotehian ang mga subscribers sa pre-paid services sa mga telecommunication company sa nasud.
Si Velasco misang-at sa House Bill 6335 kon “An Act Improving the Consumer Rights of the End-Users of Telecom Services as Provided in Republic Act 7925.”
Kun mahimong balaod, ang mga telecommunication company mapugos sa paghatag og daily customer billing report nga maglakip sa gidaghanon sa mga calls, text messages, ang average ug maximum nga gitas-on sa tawag ug summary sa bayad sa calls ug text.
Kun mapasar sa Kongreso, ang mga cellular service providers nga dili mo-isyu og daily billing report sa mga pre-paid subscribers pamultahon og P500,000 sa unang kalapasan, P1 milyon sa ikaduha ug P5 milyones sa ikatulo.
Ang House Bill 6467 kon Cellphone Subscriber Protection Act ni Ejercito magmando sa National Telecommunications Commission pag-establisar og mga pamaagi nga mahatagan og pagtagad ang reklamo sa mga subscribers batok sa mga telecommunications company nga ubos ang kalidad.
Kun mahimong balaod, ang HB 6467 magpugos sa NTC sa pag-report sa Kongreso kada unom ka bulan sa mga telcos nga daghan og reklamo sama sa kadaghan sa dead spots, dropped calls, network busy signals ug wala magkadimao nga billing practices.
Ang maong mga reklamo, sumala pa sa HB 6467, imantala sa duha ka peryodiko nga adunay halapad nga sirkulasyon.
Napanglantawan ni Velasco nga bisan sa mga press release sa mga telecommunication company kalabot sa ilang modernization program, kadaghanan sa mga pre-paid ug bisan ang post-paid mobile subscribers daghan gihapon og mulo sa kakubos sa serbisyo.
Gihimong sanglitanan sa kongresista ang Smart Communications nga nakadawat og daghang pagsaway sa Facebook ug Twitter mahitungod niining “nakaw load” diin kasagaran sa reklamo batok niining advisory messages nga gipadala sa network nga mokibhang og P1.00 ngadto sa P2.50 kada text advisory. (BANAT NEWS)