CEBU, Philippines - Samaran ang duha ka opisyal sa Tri Gold Security Agency human unaya pagpusil sa ilang gwardiya didto sa compound sa Smart Cell site sa sitio Anapog lungsod sa San Remegio sa miaging gabii.
Ang biktima mao sila si Edgar Malazarte Lugay, 42, usa ka inspector sa maong agency ug si Leonito Toleroso Elorde, 51, usa usab ka operation officer.
Samtang ang suspetsado nailhan usab nga si Fernando Giducos Paciño, 50, usa ka gwardiya nga nadistino gihapon sa maong site.
Sa pakighinabi sa Banat News ni PO3 Jose Ylanan, sa San Remegio Police Station nasayran nga ang duha ka biktima mipahigayon og ‘routine inspection’ sa maong dapit .
Didto nasuta sa ilang pag- inspection nga si Lugay adunay mga sipyat hinungdan nga ila kini nga gisita.
Apan gikatahong kalit lang nga namusil sa duha ka opisyal busa parehong nangasamad kini sa bat-ang.
Gihatud dayon ngadto sa Severallo District Hospital sa dakbayan sa Bogo ang mga biktima samtang ang suspetsado boluntaryo usab nga nagpaposas sa iyang kaugalingon sa kapolisan nga mirespondi sa maong insidenti.
Matud pa ni Ylanan nga gisusi pa sa kapolisan kun aduna pa bay laing motibo gawas sa giingong ‘discrepancies’ sa suspetsado. Dugang pa ni Ylanan nga ang ilang kapolisan mihimo karun og halawom nga imbestigasyon kalabot sa maong hitabo.
Nakuha usab sa kapolisan ang armas nga .45 kalibre nga gigamit sa suspetsado nga adunay duha ka buhing bala.( WC) (BANAT NEWS)