Sa taga Ginatilan uwan wa makapabugnaw sa ilang debosyon

CEBU, Philippines - Wala makapabugnaw ang pagbunok sa ulan sa debosyon sa mga tawong mikuyog sa dul-an napulo ka kilometrong prosisyon gikan sa bukirong barangay diin gituohang natawo si Beato Pedro Calungsod kinsa ibayaw na karong adlawa sa pagka-Santos.

Liboang mga debotos ang nanguyog sa prosisyon bisan pa man sa pagbunok sa ulan, bata, tiguwang, hamtong ug mga opisyal sa lungsod nga nanukad pa gikan sa barangay Kagsing padulong sa San Gregorio Magno Parish sa barangay Poblacion sa Ginatilan.

Nunot sa gipaabot nga kanonisasyon sa ikaduhang Santos nga Filipino nga si Calungsod karong adlawa didto sa Vatican sa Roma gibutang sa heightened alert ang kapolisan sa lungsod sa Ginatilan ug sa dakbayan sa Toledo.

Ang hepe sa kapolisan sa probinsiya nga si Senior Superintendent Patrocinio Comendador nagkanayon nga sa barangay Cantabaco, Toledo City diin mahimutang ang simbahan ni Beato Calungsod gipaabot nga dugokon sa mga tawo ug debotos.

Samtang sa Ginatilan susamang kasadya ug kabaga gihapon sa tawo ang gipaabot nga modagsa tungod kay gituohang diha ang kagikan ni Calungsod sa barangay Kagsing.

Sama sa himuon sa Beato Pedro Calungsod Parish Church sa Cantabaco adunay wide screen sa live coverage sa kanonisasyon karong adlawa diha sa Ginatilan. Si Comendador nagkanayon nga daghang mga polis ang ipadala sa maong mga dapit aron kapugngan ang mga badlungon ug mamentaha sa sitwasyon tungod sa bagang duot sa mga tawo.

Sa laing bahin, ang hepe sa kapolisan sa Ginatilan nga si Inspector Christopher Castro nagkanayon nga kagahapon pa (Sabado) nagsugod na ang mga kalihukan alang sa kanonisasyon ni Beato Calungsod.

Usa ka prosisyon gikan sa barangay Kagsing paingon sa San Gregorio Magno Parish sa barangay Poblacion sa Ginatilan ang gihimo, kini distansya og 10 ka kilometro gikan sa Poblacion.

Gawas sa mga polis miabag usab sa pagbantay sa seguridad ang mga barangay tanod. Ang hepe sa Cantabaco police sub-station sa Toledo City nga si Inspector Bonifacio Lucerna nagkanayon nga dunay mga polis ug mga tanod ang gipapundo nang daan sa simbahan.

Matud niya nga dunay mga deboto nga gikan sa dakbayan sa Mandaue, Lapu-Lapu ug Cebu ang miabot kagahapon sa hapon.  Karong Oktubre 25, 2012 ang maong grupo dunay ipahigayong caravan gikan sa maong parokya paingon sa amihanang bahin sa dakbayan sa Bogo.

Si Lucerno midugang nga andam na usab sila alang sa siguridad atol sa mga ipahigayong kalihukan may kalambigitan sa kanonisasyon ni Beato Calungsod.

Ang kanonisasyon saksihan sa minilyong mga Filipino sa tibuok kalibutan pinaagi sa telebisyon ug internet gawas pa sa 4,000 ka delegado gikan sa Pilipinas ug mga Filipinong namuyo na sa Italya.

Gawas kang Calungsod duna pay unom ka mga beato ang gikatakdang ibayaw ngadto na sa pagkasantos karong adlawa. (EIM) (BANAT NEWS)