Gi-torture tungod sa gatas

CEBU, Philippines - Usa ka inahan nga gipasanginlang nangawat og usa ka karton nga gatas aron ipatutoy sa tulo pa ka buwan niyang anak mipasangil nga gi-torture siya sa tag-iya sa tindahan ug sa gwardiya niini dihang siya ilang nasakpan.

Ang maong 40-anyos nga ginang nga taga South Poblacion sa lungsod sa San Fernando  giingong  walay trabaho lakip na ang bana niini.

Ang pagreklamo sa ginang diha lang nahibaw-an dihang kini misumbong sa ABS-CBN TV Patrol Central Visayas ug wala sa police station sa maong lungsod.

Sa pakighinabi sa Banat News ni PO1 Cleofas Cabrera sa San Fernando Police, kini mibutyag nga wala moreklamo kanila ang ginang kabahin sa pag-torture kaniya sa gwardiya ug sa tag-iyang babaye.

Matud pang Cabrera gihatud sa gwardiya nianang gabii na sa police station ang ginang ug gitumbok nga nangawat kini og usa ka kartong gatas.

Ang ginang sa reklamo niini diha sa migawas nga report miangkong nahimo niya ang pagpangawat og gatas tungod kay wala siyay kwarta ug gigutom ang iyang tulo pa ka buwang anak nga dunay sakit.

Matud pa niini nagpakiluoy siya sa duha nga pasayloon lang tungod kay nahimo niya kini tungod sa kawad-on apan giingong gi-torture siya pinaagi sa pagdukdok sa iyang mga kamot sa puloan sa armas sa gwardiya ug gihapak siya og puloan sa armas diha sa agtang.

Giingong gitamparos usab siya sa tag-iyang babaye hinungdan sa iyang mga bun-og, ang mga bun-og ug bukol nakit-an usab sa pag-umangkon sa ginang nga midason sa pangangkon  niini diha sa maong report.

Sumala pa sa report gibanabanang naabtan og duha ka oras siyang gitanggong sa usa sa mga lawak sa maong tindahan diin giingong nahitabo ang pag-torture kaniya una pa siya gi-turnover ngadto sa kapolisan niana nang pagkagabii.

Matud pang Cabrera gipasaylo ra ang ginang sa tag-iya sa pagpangawat niini sa gatas pinaagi sa pagpinirmahay og kasabutan nga iyaha kining bayran kung makakwarta na kini.  (BANAT NEWS)