Oktubre 26 regular holiday

CEBU, Philippines - Gideklarar ni Presidente Benigno “Noynoy” Aquino III nga regular holiday ang Oktubre 26 agi og pakighiusa pagsaulog sa Eid’l Adha sa mga Muslim.

Matud pa ni Presidential Spokesman Edwin Lacierda, gilagdaan sa presidente ang Proclamation No. 488 nga nagdeklarar sa maong petsa nga usa ka regular holiday sa tibuok nasud. Ang Eid’l Adha usa sa pinakamahinungdanong kasaulogan sa Islam sa tibuok kalibotan maong girekomendar kini sa National Commission on Muslim Filipinos (NCMF) kang Aquino nga ideklarar nga regular holiday.

Ang Pilipinas nga gidominar sa mga Kristiyano adunay minoriyang mga Filipinong Muslim ilabi na sa Mindanao ug pat-ak pat-ak nga komunidad sa mga nagkadaiyang siyudad sa nasud. Tungod sa maong holiday nagpasabot kini nga magsunod ang long weekend sa dili pa mosulod ang kalagkalag.

Kini tungod kay special non-working days man usab ang Nobiyembre 1, Huwebes (All Saints Day ) ug Nobiyembre 2, Biyernes (All Souls Day) base sa Proclamation No. 295 nga gilagdaan na daan sa presidente niadto pang Nobiyembre 24, 2011.( /EIM) (BANAT NEWS)