Pagbantay kanunay, di lang sa giatubang nga hulga dala sa novel coronavirus disease, hasta ang mga social media account sama sa Facebook dili na kakumpiyansahan tungod kay dunay mga mangopya niini.
Kagahapong adlawa, daghang mga Facebook users ang nakurat nga duna silay mga kaparehas og accounts. Ang accounts nga kaparehas nila og pangalan walay picture profile ug wa pa sab mga “friends” niini.
Way nasayod kun unsa kini ug kun kinsa ang naghimo niini. Ang mga otoridad sama sa PNP Cyber Crime Unit wa pay gihatag nga pamahayag bahin niini.
Karong panahona, daghan na kaayong binuang diha sa social media, mahimong gamiton ang account sa inosenteng netizen sa krimen, paghimo og kasamok, pagpangatake sa ubang tawo ug daghan pang mahimong gamitan niini.
Daghang kaayong posibilidad nga gamiton kini sa binuang kung tinuyoan kini paghimo. Kay kun wala pa, dili kini mahitabo.
Apil sa posibleng paggamit niini sa binuang ang pagpakatap unya og mga fake news, disinformation, political propaganda, kay hapit na sab ang umaabot nga eleksyon. Sa nakalabay nga mga piniliay, dili lang sa Pilipinas, dako kaayo og papel ang social media nga nakaingon sa pagdaog sa mga politiko. Gigamit ang social media pagdaut sa ilang mga kontra ug gigamit sab pagpahumot sa kandidato.
Angay magmatngon ang tanan tungod kay high tech na sab ang paghimo og krimen o binuang karon, bisan pangalan lang sa netizen nga gamiton sa dautan daghan nang posibleng dautang mahitabo sa mga inosenteng tawo ug sa netizen kansang pangalan maoy gigamit.
Ang teknolohiya dako kaayo og natabang sa tawo nga mapadali ang tanang ginbuhaton, mga transaksyon sa negosyo o sa bangko, apil na usab niini bisan ang paglingaw-lingaw.
Apan dunay peligro para sa mga wala kaayo magmatngon sa mga pasiot-siot niini. Angay unta magmatngon kanunay ang si bisan kinsang nigamit sa internet bisan sa lingaw-lingaw lang sama sa Facebook, Twitter ug uban pa.
Kay ang mga dautan nagka-high tech man sab kay naa sa internet ang mga sayon nga pamaagi pamiktima.