Lancers kampiyon na gyud sa Bayugan

BAYUGAN CITY, Agusan del Sur, Philippines – Sa ikatulong pagsuway,  naangkon na gyud sa  University of   the  Visayas  (UV)  Green Lancers ang gihandum nilang kampiyonato.

Kini human ang Lancers nakaipsot batok sa University of Sto. Tomas (UST) Growling Tigers, 90-89 sa makapaisa’g balahibo nilang final match aron pagdominar sa 2nd Mayor Kim Lope A. Asis Collegiate Basketball Tournament nga gipunsisukan sa  fans dinhi sa Lope Asis Memorial Gymnasium niadtong Huwebes sa gabii.

Nasuwertihan gyud ang Lancers sa ikatulo nilang misyon nga sakmiton ang korona.

Kahinumduman, ang Lancers na-third  niadtong 2015 ug mipahiluna sa ikaduhang dapit sa Far Eastern  University (FEU) Tamaraws sa miaging tuig, apan karon naghudyaka    na    sila sa bantawan sa kadungganan.

“Nindot gyud kaayo ang feeling nga human sa ikatulo namong pagsuway, nakuha na gyud namo ang title,” matud pa ni UV coach Gary Cortes.  “I give credit to my boys for giving it their all.”

Sa wala pa gitungas ang bukid sa  kalampusan, nag-agi una og malisud nga dalan ang Lancers sa sikit nga duwa nga miresulta ngadto sa walo ka panagtabla ug 10 ka lead changes.

Ang Tigers naglabaw sa katapusang higayon, 87-83 gumikan kay si CESAFI MVP Rey Anthony Suerte miiskor og singko puntos sa 7-0 run nga nakapaabante kanila, 90-87 sa nahibilin nga 52 segundos.

Human nagsinukliay og sipyat, si Jordan Sta. Ana mipasulod sa malisud niyang lay-up aron pagpasikit sa UST ngadto sa 89-90 gawas nga nakakubit siya og foul ni Tristan Albina sa nahibilin nga 12.4 segundos sa duwa.

Si Sta. Ana nasipyat sa iyang free throw nga makapatabla unta sa iskor, apan ang Tigers maoy nakaangkon sa posisyon human na-last touched si Suerte.

Sa final nilang opensiba, anaa tanan sa Tigers ang tsansa nga modaog, apan sila si Sta. Ana ug Joko Macasaet parehong nasipyat sa duol kaayo nilang itsa diin ang bola igo lamang mihawok sa ring dayong kapupos sa oras hinungdan sa paglutaw sa Lancers sa panganod sa himaya.

Si Jerome Napao mitapos bitbit ang 16 puntos, samtang sila si  Albina ug Bassieru mitali og 14 puntos matag usa. Sila si Sheldon Gahi ug Gileant Delator parehong mikadlit og 10 puntos alang sa Lancers nga mibulsa og P200,000 nga ganti. Ang UST midawat og P150,000.

(BANAT NEWS)